Nagaland nung Paryatan Parv-“Dekho Apna Desh” amung

October 20 , 2017 nü Paryatan Parv sentong nung painting competition takokertem den Directorate of Tourism, Nagaland ketdangsertem agiba noksa angur.

Dimapur, October 20 (TYO): Linük den liromedema Nagaland nunga tanü Paryatan Parv- “Dekho Apna Desh” ayongzüka mungogo.
Ministry of Tourism, Government of India, DoNER aser NEC kübok Directorate of Tourism Nagaland-i iba sentong ayongzüka amung.
Iba anogomung tenüng nung eco-tourism indang Kohima inter school painting competition ka ayonga agi aser iba nung Holy Family Higher Secondary School nungi Bendangakum-i mezüngbuba jenjang takok angu.
Tanabuba jenjang nung Northfield Higher Secondary School nungi Teisoneise Sachii aser tasembuba nung Mezhur Higher Secondary School nungi Aniizo Nienu nati takok ngua liasü.
Sentong nung Kekhrie & Azi, Kohima village nungi Pfuchazhiinuoko aser Pholami village nungi Pfuchazhiinuoko nungertemi sobaliba shilemtem agi.
Sentong nung Directorate of Tourism Nagaland joint director, Akhale Vizol-i okila jembidang, alima nung kanga dang karaba ainba industry tem rongnung tourism ya ka lir ta ashi.
Tourism ajanga linük ka rongsenkettsüng ajungkettsür aser iba ajanga mapatem agütsür. Anungji asenoki tourism ajungkettsüla, ta laisa ashi.
Sentong nung mendenji Directorate of Tourism Nagaland deputy director, Ajanuo Belho liasü, tesayurtem tenüng nungi Vikechiino Sachii-i o jembi aser Directorate of Tourism Nagaland assistant director, Veyielo Doulo-i anküp tepela o jembi.