Nagaland nung Passport Seva Kendra lapok

Dimapur, January 15 (TYO) : Hokolbarnü new DC complex, Dimapur nung Minister of State for External Affairs  Gen. (Dr) V.K. Singh (Retd.)-i Passport Seva Kendra (PSK) ka lapoktsüogo.

Tanü Nagaland nung lapokba Passport Seva Kendra ji North east nung PSK tibuba asütsü. Ministry of External Affairs-i iba osang ya Nagaland nung alir asoshi küm tasen sempet ka ama metetdakja liasü.

Nagaland nung PSK lapokba ajanga Nagaland nung alirtemi passport services ajak peria angutsü. Tang nungibo passport aginürtemi Guwahati tonga aotsü nüngdak madoktsü.

Minister of State for External Affairs-i North East state ajak nung PSK lapoktsü nüngdak ta ajiteta iba mapa inyaktsü tenzük aser Arunachal dak alaka tanü tanüngba state ajak nung PSK lapokogo, ta Gen. (Dr) V.K. Singh (Retd.)-i o jembidang ashi.

MEA-i PSK lapokba alizüngji MEA-i lateta aliba mapang shitak nung passport clearance, aser passport issuance atema lir aser iba kasaji Nagaland nunga asütsü. Passport aginürtemi Subsidiary Intelligence Bureau (SIB) nungi temelaba talila ka nüngdakba indang khuret chief minister-i lemsatepogo aser iba khuret pongpadaktsütsü atema mapa inyaktsü, ta Gen. VK Singh-isa metetdaktsü.

Tanü PSK lapokba anogo nung Misniter of State Gen. V.K. Singh-i nisung pungu nem passport lema agütsü.

Tanü iba sentong nung Chief minister TR Zeliang-i o jembidang ashiba, passport aginürtemi Subsidiary Intelligence Bureau (SIB) nungi temelaba talila ka agitsüsa akümer aser ibaji melira Regional Passport Office-i passport magütsüter, saka temelaba agütsütsü atema SIB-i 2-3 shi ka agir.

Tamalenbo North East state tem – Meghalaya, Mizoram, Manipur aser Nagaland atema SIB nungi temelabaji nüngdaka liasü, saka Nagaland dak alaka tanga state tem nungibo SIB inyakyim agienogo. Aji agi, tanga state tem ama Nagaland nungaSIB temelaba agientsü, ta chief minister-isa ashi.

Iba sentong nung Mukesh Kumar Pardeshi, Joint Secretary of Ministry of External Affairs and Chief Passport Officer-i ashiba agi, Ministry of External Affairs-i taküm küm tsüngda passport office 37 aser PSK 86 lapoktsü sentong lir.

Dimapur nung PSK lapokba sentong nung MEA, state sorkar nungi ketdangsertem den minister aser parliamentary secretary tem aden. Sentong nung T Ajungla Jamir, RPO-i tesentepertem pela agizük aser MS Thangpong, DPO, PSK Dimapur-i anküp tepela o jembi.