Nagaland nung petrol pump ajak shibanger lungkak aiter

Tentonü (Hombar) Karbi Anglong, Assam kübok Lahorijan nung Nagaland nungi garitem totzü alitsü atema anendena aliba noksa nung angur. 

Dimapur, Rongchii (April) 30 (TYO): Nagaland nung petroleum transporters aser retailers ajaki tanü nungi mapang telatet makai lungkak aittsü tenzükogo.
Anogo ti jakdang mejangjatetba nisungtemi totzü abenba gari driver aser handyman pur aoba kümzükang ta takhangba agüja parnoki lungkak aiter.
State sorkaria nisungpur tem dang nisung ana chioktsü mepishia metetdaktsüogo.
Yasüng ayaterm nungi Kohima Petrol Pump Dealers Association, Dimapur Petrol Pump Dealers Association, Nagaland Tanker Transport Association aser Oil Tanker Drivers Union, Dimapur teloktemi lungkak aittsü tenzük.
Parnoki state sorkar nem anogo latettsüba süiba sülen lungkak aittsü tenzüker, ta telok pezüi sangdong ka nung ashi.
Telok pezü jagi Rongchii (April) 27, 2018 nü state sorkar dang ghonda 28 tsüngda totzü abenba gari driver Tularam Buragohain aser pa den yariteper Adman Surin na kümzükang ta takhangba agütsü. Tenaji Rongchii (April) 22, 2018 nü Tuensang district kübok New Helipong yimtsüng nungi pur ao.
Tena taküm mekümzük tashi lungkak aitba manentsü, ta telok pezüisa metetdaktsüogo.
Ano külen, Tentonü (Hombar) Nagaland sorkar nungi Political Affairs Committee (PAC) senden ka amen aser idangji parnoki nisungpurtem dang driver o handyman na chioktsü atema mepishia metetdaktsü.
Nagaland state tensa meraksatsü atema tena chioktsü mepishir ta PAC member secretary aser Nagaland Chief Secretary Temjen Toy-i sangdong ka nung ashi.
State nung ozüng amertemia tena kümzüktsü atema akokba tashi mapa inyakdar, ta paisa shisem.
Tanü Dimapur nung totzü ayokdak ajak shibang aser iba ajanga traffic kanga ajema liasü.
Nagaland nungi gari aika Lahorijan nung totzü ayokdak tarensena atatep aser osang angazükba agi Lahorijan nung totzü ayokdak kar nungbo totzü temadok.
Iba tensa nung tajangzük bushia Lahorijan nung totzü ayokertemi totzü nung jenjang tur ayoker ta osang angazüker.