Nagaland nung Police Commemoration Day amung

Kohima, October 21 (Agencies): Linük den liromedema Nagaland nunga Honibarnü Police Commemoration Day ayongzük amung.
Police New Reserve Phesama nung ayonga amungba sentong nung police 338 nem tetushi agütsü. Parnokji September 1, 2016 nungi August 31, 2017 tsüngda linük kümzüka ayutsü atema mapa teinyakdak nung asübatem liasü.
“Parnok asenok den mali saka parnoki inyaktetba mapa tajungtem asenoki tatishitsü süa amshitsü atema toktsür ogo. Parnok tanüng anisüngzük ngudakjangma” ta tasürtem atema nüngshilung yangluba lung nung zülua lir.
Tanü agiba sentong nung Director General of Police (DGP) Nagaland, L L Doungel-i police tem ayongzüka o jembi.
Pei tajungtiba agi nübor tenzüktsü wadang inyakang, ta L L Doungel-i tajungshi o jembi aser paisa tasür 383 indang tenüng zünga metetdaktsü.
Iba mapang Nagaland police nungibo tasür shinga maliasü.
Küm shia October 21 nü linük ajungalen Police Commemoration Day amunger aser iba anogo ya linük atema taküm bendanga agütsür tasütait police tem nem tetushi agüja amunger, ta Nagaland DGP-isa metetdaktsü.
October 21, 1959 nü Hot springs Ladakh nung SI Karam Singh-i aniba CRPF telok ka China nunger sepaitem amak aser iba mapang CRPF jawan 10 taküm lalua liasü. Iba anogo tenüng nung Police Commemoration Day amungtsü tenzük, ta paisa ashi.
October 21, 1959 nü Chinese Army-i CRPF jawan 20 dak grenade amshia amak aser idangji parnok 10 asü aser tenet puir ao. Tanüngba jawan asem China nunger sepai ket nungi jena otet.
January 1960 nung Inspectors General of Police of States and Union Territories indang Annual Conference alidang October 21 nü linük asoshi taküm bendanga agütsüba tasütait police nem tetushi agüja linük ajunga nung Commemoration Day amungtsü telemtetba agia liasü.