Nagaland nung RPWD Act 2016 mapa küma inyaktsüla

Kohima, Yimpoksüi (November) 21 (TYO): Nagaland sorkari state nung Rights of Persons with Disability (RPWD) Act 2017 benokba pela agizüker saka onoki 1995 Act ozüng tejen ama iba Act tasenba mekümdaktsütsü, ta Nagaland nung matamabensartemi metetdaktsü.
RPWD Act ya December 2016 nung parliament nung agizük aser April 2017 nung ozüng ka aküm. September 27, 2018 nü state sorkari Nagaland nung RPWD Act 2016 benokba osang metetdaktsü.
Nagaland nung tang Differently Abled Persons aser PwDs 29,631 lir.
“Iba ya matamabensartem atema alizüng tulu ka atongba lir aser sorkari iba mapa inyakba onoki pela agizüker” ta tanü Diethono Nakhro-i ashi.
Diethono ya disability rights activist ka lir aser Nagaland nung People with Disabilities (PwDs) indang icon lir. Tanü Hotel Japfu nung osangbener senden ka nung lai iba olen jembi.
State tem aser union territory tem nung ita trok tsüngda State Rules indang osang sangdongtsüla saka Nagaland nung mapang talangka iba Act mebenokba atema onoki state sorkar rongshiyonga aru, ta laisa shisem.
“Onoki taoba sorkar aser tang teinyakdak sorkar dang iba Act benoktsü atema asüngdang saka September 27 nung ang iba osang sangoktsü. Iba ya mezüng mera ka dang lir aser ozüng akangakanga mamshira, iba sangdong agütsüba agi mapa kecha tajangzük mangutsü, ta Diethono-isa metetdaktsü.
Tawa osangkaket ka nung haemophilia (azü tashidak) agi kangshiba lanur ka indang osang metetdaktsü. Iba ajanga nübortemi RPWD Act 2016 indang osang tejangja memetet ta sayur aser ibaji talisa sorkar department ketdangsertemi metettsüla, ta laisa ashi.
Iba Act tasenma meyangludak Disability Act ka liasü. Iba act ya The Persons with Disabilities (Equal Opportunities, Protection of Rights and Full Participation) Act, 1995 lir aser küm 20 tashi benshiyonga aru saka Nagaland nung iba dak sendakba ozüng ka danga shitak benoka meinyak, ta laisa shisem.
Tang Nagaland nung Act tasenba benokogo anungji onoki RPWD Act 2016 ya 1995 Act ama mekümdaktsütsü, ta Diethono-i ashi.
Mon district nungi Longlong Konyak dak atalokba indang jembidang lai “RPWD Act kübok Haemophilia, Thalassemia aser Sickle Cell Disease tem ya disabilities ta züngoka lir saka health department-i iba ya memeteti liasü” ta ashi.
Shitakba agibo Longlong ya angati anepalutsüba liasü saka par district mesüra Dimapur District Hospital nung pai nüngdakba teyari mangu. Iba ya tangutsü temeten magütsüba inyakyim ka lir. Anungji Health Department-i Act nung aliba ama People with Disabilities temang timi anepalutsü atema mapa inyaktsü nüngdaker, ta Diethono-i nenshia metetdaktsü.