Nagaland nung Rshtriya Ekta Diwas anogomong among

Kohima, October 31 (TYO): October 31, 2019 nü linük den liromedema Nagaland nunga linük nung mezüngbuba Deputy Prime Minister aser Home Minister, Sadar Vallabhbhai Patel asoba anogomong nüngtem nung Rshtriya Ekta Diwas (National Unity Day) mongogo, ta ketdangsertem osang ka ajanga metetdaktsü.
Iba dak sendakba nung Principal Secretary Home, Abhijit Sinha, IAS leniba nung Civil Secretariat nung sentong ka ayongzüka agi. Iba sentong nung jembidang Principal Secretary-i, Sadar Vallabhbhai Patel ya linük nung lenir tajungtiba rongnung ka ta züngshir aser modern India yangertsü tenzüksangji pa liasü, ta ashi.
Sinha-isa, India nunger nüchiso mongui alidang Patel-i tongtibang shilem ka agi aser linük nüchiso nung tongtibang shilem agi, ta ashi.
India kübok princely states balala pai longjemdaktsü aser linük longjemdaktsüba ajanga pa nem “Iron Man of India” jaloktsü, ta Abhijit Sinha-isa ashi.
Sentong lenirisa ketdangsüa sentong nung adenertem nem Unity Day tenangzükba agidakja liasü.
Kiphire aser Mon : Sardar Vallabhbhai Patel asoba anogomong dak sendakba nung amongba “Rashtriya Ekta Diwas” (National Unity Day) anogomong October 31, 2019 nü Kiphire district nung “Run for Unity” sentong agiogo; iba sentong ya SP office Kiphire-i ayongzüka liasü aser asemtepba sentong nung school balala nungi kaketshirtemi shilem agia liasü, ta ketdangsertem osang ka ajanga metetdaktsü.
Asemtepba nung mezüngbuba jenjang nung takok angurji Trinity high School nungi Pisali liasü aser tanabuba o tasembuba jenjang nung takok angur kaketshir anaji Likhumba (Govt. High School Kiphire) aser Lumkhaba (Elbeth High school) na liasü.