Nagaland nung Rubber plantation indang kaket ka saya

Kohima, October 4 (TYO): Land Resources Department Director, Hoto Yeptho-i tanü “Rubber Plantation in Nagaland – The socio-economic impact” ta ser kaket ka sayatsüogo. Iba kaket ya Dr M Temjen Longkumer-i züluba lir.
Yeptho-i o jembidang, 1999 küm rubber plantation atema nodal department lemzüktsüba sülen Land Resources Department-i Naga nunger ajungmesotsü atema mapa inyakdang timtem ajuruba indang osang metetdaktsü.
Rubber plantation ya mapa tasak saka Assam, Tripura aser Meghalaya nung iba mapa takok ngua inyaktet. Land Resources nem nodal department lemzüktsüba sülen rubber plantation indang inyakyimtem angazüktsü atema bendang linüktemi ao aser 1999 küm tom ka nungi Naga nunger dang rubber lu ayimtsü tenzükdaktsü, ta paisa ashi.
Tanü iba ya movement ka ama kümogo aser nisungtemi mulungsoa department ket nungi rubber stems bener aoer aser rubber lu ayimer. Rubber atemba sülen küm 7 sülen nungi agizüker aser küm 30-35 tashi agizükteter. Iba sülen süngdongji süngpak atema arangtsü akok, ta Yeptho-isa shisem.
Paisa ashiba agi, rubber lu ayimertemi ita shia sen 40-45,000 shi aazüktsü akok.
Kaketzülur Dr M Temjen-ia o jembidang, kaket ya research study ka lir aser kechisarena atema amshitettsü.
Iba kaket nung rubber lu ayimba, tayongzükbatem ajuruba, Rubber Board of India nungi teyari, rubber nungi tajangzük angubatem aser tanga onüktem dena lir, ta paisa ashi.
Kaketji jenjangji sen 30 lir aser state kübok bookstalls nung angutsü, ta Dr M Temjen-isa shisem.
Nagaland Institute of Development Studies-i kaket adoktsüba atema paisa pelaba metetdaktsü.