Nagaland nung ‘Sadbhavana Diwas’ tenangzükba agiogo

Dimapur, August 20 (TYO): India ajunga den tsüngkang medema Nagaland nunga Sadbhavana Diwas anogomong tanü Brihostibar nü mongogo.
Nagaland State Chief Secretary, Pankaj Kumar IAS-i anir külen Kohima kübok Secretariat Conference Hall kilung nung sentong tajung ka agia Sadbhavana Diwas anogomong amongba osang jangjaogo.
“Nüburtem rongnung amalitep aliba ajanga terenlok aser tesünep alir, anungji nüburtemi amaliteptsü aser lokti tentet temaba jenjang nung ajungkettsütsü asoshi tali bendanga agütsütsüla,” ta Kumar-i tayongzükba olen ka lemsatepba sülen sentong nung shilem agirtem nem Sadbhavana Diwas tenangzükba agidaktsü.
Ano, Directorate of Information & Public Relations (DIPR) nung ketdangser aser mapa inyakertemia tanü DIPR kübok Conference Hall kilung nung sentong ka agia Additional Director, Department of IPR, Limawati Ao-i anir Sadbhavana Diwas anogomong tenangzükba agia liasü.
“DIPR züngsem ajungai anogo shia mapai aotsü aser pei nem nungloktsüba mapa bendanga agüja inyaktsü ajungshir,” ta Director, IPR, Pausui Zeliang-ia sentepa alirtem ayongzük.