Nagaland nung sensaker meyong jangotsü tulurtemi agir : ACAUT

Dimapur, April 14 (TYO) : Center sorkar nungi Nagaland nung sensakertem asoshi yokba jang, wheat, kerosene aser shini ajak sorkar nung yimsüsür aser tulurtemi state stockiest aser parnok tenüng nung inyakertem den lemsatepa agir, anungji item ochimashi mapatemji nokdangtsü atema Food Security Act (FSA) latettsüla ta ochimashi mapatem anema inyaker ACAUT teloki metetdaktsüogo.
India nung Nagaland aser Manipur dak alaka state ajak nung FSA ozüng lateta lir . Iba ozüng ajanga tom nung nisung shingaia sensakertem asoshi teyari yokba jangotsü miimzüka magitettsü.
Talisa Nagaland nungbo jang aser wheat atema stockiest shimtsü asoshi kodanga tender jadanga mali aser item stockiest-tem ajakji Naga nunger tenüng nung tsümartemi inyaker.
Taoba küm 13, 2002 nungi 2015 tashi wheat atema state stockiest-ji nisung ka tenüng agi T. Sema liasü iba jagi tender süa shimtsüba inyakyim lateta aliba ajak temenünütsüka kümdaktsür. Ibaji tatem masü saka T.Sema melena inyakertem G. Sarkar o B. Jain na lir. Ano, tesüngmangtsükaji wheat agibo Nagaland matonger. Iba atema 2015-16 küm Khrietuo Angami stockist shim aser pa tenüng nung M. Thapa aser B. Yadav nati inyaktsü “power of attorney” agi.
ACAUT-isa ashiba agi, 2001-02 aser 2015-16 küm nisung ishika AAY jang atema stockiest shimertemji Jemti Ao , M. Angami, Ato Natso, Ruokuo Angami, Lobacca Zhimo aser R. Zhimomi nungertem liasü aser ano parnoki D. Chakravarty, W. Bendang, B. Yadav, B. Jain, G. Sarkar nungertem nem “power of attorney” agütsü.
Ano APL jang atema state stockiest asütsü asoshi 2001 nungi 2016 küm tashi Jemti Ao, Neitilie kuotsu, Tali Ao, V. Angami, A. Samuel Ayemi, Mezhu, Isaac Solo, Bendang Ao, N. Konyak, Lese Angami, M. Angami, Ato Natso, IK Angami, Vizhekho Angami, Khrielie Angami, Kuthu Newmai nungertem shim aser ka mapa atema power of attorney agütsürtemji W. Bendang, S. Singh, Naresh Adhikari, Kamal Dey, M. Thapa, S. Thapa, P. Chand, Arun aser Janglal Yadav nungertem liasü ta parnokisa metetdaktsü.
Tesüngmangtsükaji ano taoba küm 15 tepiyong shini atema stockiest shimtsü asoshibo tender ken dang agüja liasü ta ACAUT telokisa metetdaktsü.
CAG osang nung Food & Civil Supply department nung sen crore 402 mashi amshiba osang agüja lir, ibaji Naga nunger sensakertem asoshi tagizüktettsüla mapa masü, anungji onoki tatem tashi bushitsü ta ACAUT telokisa metetdaktsüogo.
Joko, 2016 küm nungibo Civil Supply department ajanga sensakertem nem jang, wheat, shini aser kerosene agizüka agütsütsü asoshi stockiest shimba mapa ya Tender ajanga shimtsüla ta ACAUT telokisa metetdaktsüogo.
Nagaland nung ajak dang ochimashitiba department-tem rongnung Food & Civil Supplies department ya ka lir, anungji yimsüsür aser tulurtemi ochimashi inyakba mapatemji nokdangtsü atema Puducherry aser Chandigarh nung inyakba ama “Direct beneficiary Transfer (DBP) inyakyim ajanga sensakertem bank account nung dang wheat, jang, shini aser kerosene ama alitsü sen indangindanga enoktsütsüsa inyakyim tasen ka latettsüla ta ACAUT teloki metetdaktsüogo.