Nagaland nung senso

Nagaland nung sensosangertemji Naga nunger dang masü saka Naga nunger masüba kintem nema Nagaland senso asütsü asoshi temeten agüja lir. Ibaji angatet nung dang asenoki tang bendangertem nem India senso agütsütsü asoshi tatar hoho (parliament) nung jembiba onük ya tajungba angatettsü aser asenok temeten akangshia yutettsü. Nagaland state yabo India telongjem kübok tanga state-tem dang nungi yimten jenjang (political status) balaka nung küma lir ta asenok ajaki meteta lir. Iba ama jenjang tajung ka indangji, 16 Point Agreement aser India temzüng arla 371 A nung lateta aliba indang, talisa, tang ama Citizenship Amendment Bill aser Inner Line Permit indang jembidang kanga süokia jembir. Atangji, tang ama India tatar hoho nung senso temeten indang jembiba mapang ya asenok Nagaland nung alirtem asoshia senso temeten jangjashiba mapang ka asütsüla. Northeast nung tanga state-tem toktsür, talisa, Assam nung BJP telok dak alaka tanga yimten teloktem aser All Assam Students’ Union (AASU)-i tang Citizenship Amendment Bill anema apusoba kuliji, Assam nung senso küma alitsü asoshi bendanglen nungi 1971 küm March 25 tashi nung arurtem asütsüla ta  1985 küm 15 August nung center government den renemba Assam Accord nung shia aliba nungji matsüngshitsüla ta nokdaker. Ajisüaka, tang Cuitizenship Amendment Bill ya agizükra, 2014 küm tashi nung Assam nung arua alirtem dena India (Assam) senso akümtsü, anungji ibaji Assam Accord nung lemtetba anema asütsü. Aji kanga shitak aser atangji 2014 küm tashi nung arua alirtem ajak India senso kümdaktsünungbo Assam nunger lisopurtem asoshi kanga lendong asütsü. Assam nunger amaji, Nagaland nunga Nagaland senso asütsü asoshi Nagaland state kümer 1963 küm mezüng electoral roll adokba nung tenüng alirtem aser parnok dak nungi jakzüker chirnur aser semchirsemnurtem nem temeten agütsür. Anungji, talisa Dimapur nung Marwari, Bengali, Punjabi aser Assamese nungertem aika Nagaland senso kümer lir. Parnokjibo parnok meyong ali aser kiojen lir, kechiyong parnok nemjibo Nagaland government-i Nagaland senso jenjang agüjadokogo. Iba kasaji, ashiko, Dimapur, Kohima aser Mokokchung nung Nepali nungertema Nagaland senso kümer alitsüa akok. Anungji, Nagaland nung ya Nagaland senso tapu ana lir, kaji Naga nunger aser kaji 1963 küm jakdang Naga lima nung arua alirtem. Iba jagi asenok senso temeten tali jangjashitsür. Atangji, Nagaland sensosa süaka tsümartemi, Dimapur dak alaka, tang Inner Line Permit nüngdakba tesem tashi nung ali kimong madak kibur akümtsü makok, kechiyong parnokji Naga nunger masü. Iba amaji India senso süaka Nagaland senso masüba tsümartemi Dimapur nung asüyonga alikimong alia kibur mekümtettsü, kechiyong Dimapur ya Nagaland lir. Ajisüaka, tanü asenoki Dimapur renlokba ya reprangdangra, Dimapur town nungi Chumukedima tashi nung kimong tasen alia ki tululu süyonga aobaji teimbaka 1963 küm sülen arurtemiang kibur küma amanglemba angutsü. Ibaji linük temzüng arla 371 A anema lir. Ajisüaka, Naga nunger Nagaland sensosangertemi aji temzüngi melaba asü memelabaer memetet, anungji 1963 küm sülen tesem balala nungi aruagi Nagaland nung ayanga takar akümertemi Naga nunger li aser kimong tajungbo ajak alimadagi. Iba ama tia ka nung ano India nung 2014 küm tashi nung arua alir Bangladesh Hindu nungertem nem senso agütsü nungbo, parnokiang Naga nunger li tuluba aliyonga aotsü aser küm 20 sülenbo asenokang bendanger ama akümtsü. Iba amaji ILP bener Nagaland nung senso küma aliba aser 1963 küm sülen arurtemi Dimapur nung alikimong alizükyonga aoba mapatem ya Nagaland senso akoksatsüsa temzüng anema inyakba mapatem ser nung, Naga nungertemi memetet ama yutsürji, bendangertemi asenok madak nütsüng züinba nung dang masü saka rongsen madaka moksepdagi. Item tebilemtsü ya, tang aser tarutsü Nagaland kümzüktsü asoshi, tatar yimsüsürtemi reprangteta tatar senden nung jembitsü tim.