Nagaland nung Shiksha Saptah pongunü buba mungogo

Dimapur, Chiteni/July 29 (TYO): National Education Policy (NEP) 2020 benoker küm pezü ajungba bilemteta Nagaland tesem ajungalen aliba school tem nung Shiksha Saptah (Education Week) pongunü buba nung Skilling & Digital Initiatives Day munga liasü.

Iba anogo skill nung ajemdaker angazükba aser digital initiatives dak sendakba nung maparen balala Government aser Private school tem nung inyaka liasü. ‘Skilling options’ balala aliba kaketshirtem nem angatetdakja ‘traditional academics’ alema oa career nung lenpalenre bushitsü aser digital oset balala amshia tajungba nung angazüktsü atema awareness agütsütsü nükjidong nung iba sentong ya ayongzüka liasü.

Iba sentong ya department-i Kohima district nung Thinuovicha Memorial Government Higher Secondary School nung ayongzüka kaketshir temi practical mapa inyakba sayua liasü. Iba mapang kaketshirtem dang ‘raised-bed’ yangluba aser seedling tray nung soilless nursery tem yangluba sayua parnoki ali ketdangsüba aser süngdong-lidong atemba yimyatem angazük, electrical wiring, king chilli pickle yangluba, paper bag yangluba amala sayua liasü.

Hands-on skilling activities balala den külemi kaketshi temi digital initiatives balala nung shilem agia digital education nungi tajangzük anguba tem sayua liasü. E-Classroom initiative nung shilem ka ama Samagra Shiksha ajanga agütsüba Smart TVs nung Digital Education Tools balala amshia NCERT sentong balala sayua liasü.

Smart TV ajanga kaketshir temi jenjang tajung educational content reprangteter aser terenlok maparen balala indang angazükdaktsür.