Nagaland nung shisaluyimba rejutem melapoktsü; Deobarnü sample 4 tendangtsü bener yokogo

Dimapur, April 12 (TYO): Nagaland nung tanga tetuyuba ka magütsü tashi sorkar aser nija shisaluyimba reju ajak maneni melapoktsü. Shisaluyimba rejutem den coaching, tuition classes ajak dena lir, ta Principal Secretary, Home, Abhijit Sinha IAS-i tanü metetdaktsüogo.
Nagaland nung sorkar office tem lapoktsü ta osang sangdongba ajanga nisungtemi shisaluyimba rejutema lapoktsü atema ratatepba atema iba osang jangjashitsür, ta Abhijit Sinha-isa ashi.
Kohima aser Dimapur nung Civil Secretariat aser Directorate tem lapoktsü ta tetuyuba agütsüba atema Chief Secretary-i asüng (April 13) anepdang 11:00 ako nung AHODs aser HODs den senden ka amentsü ayongzükogo, ta paisa metetdaktsü.
Iba senden nung office tem lapoktsü aser mapa inyaktsü ketdangser aser staff shimtsü atema jembitsü. Anungji, asüng sorkar mapa inyakertem ajak kidang dang alitsü aser bangdak AHOD/HOD den osang metetpelatsü metetdaktsür, ta Abhijit-isa ashi.
Deobar nikongtsütsü 5:00 ako tashi nung Nagaland nungi COVID-19 tendangtsü atema sample 74 bener yokogo aser iba nungi sample 4 indang osang mangu lir, ta Principal Secretary-i metetdaktsü.
Tang Nagaland nung nisung 407 Home Quarantine nung aser 28 facility quarantine nung lir. Iba denji Home Quarantine asüba mapang tembanger ajak agi 5459 lir, ta paisa ashi.
“Home quarantine nung alirtem mesüra quarantine mapang tembanger kari danga aketba, temang metaa shirangba mesüra tango sashiba nung timtem kar danga ajurua Health Department indang State Helpline number- 9856071745, 7005539653 nung osang agütsütsü mepishir” ta Abihjit-isa ashi.
Nagaland tesem ajungalen tongtipang nüngdakbatem ajak peria aliba osang angazükogo, ta paisa shisem.
“Nagaland nung alirtemi tenokdangba agütsüba sülen anidakba atema kanga pelar aser ajak dangi Tepela Easter salem abener” ta Abhijit Sinha-isa metetdaktsü.