Nagaland nung SMS aser Mobile internet/data services lapoktsüogo

Dimapur, February 20 (TYO) : January 31, 2017 nü ULBs indang elections anema nübortemi lungkak aitdang police-i nisung ana kahsetba aser yirutsüba den tensa mejungi akümba atema sorkari Nagaland nung SMS aser Mobile internet/data services shibangja liasü.
Olulutem belenshiba nokdangtsü atema ta ser sorkari SMS aser Mobile internet/data services shibangtsü, saka iba ajanga nübortem timtem kanga ajurua liasü.
Kijatemi anir telok aikati sorkar dang iba tenokdangba agientsü aser talisa kaketshirtem asoshi bilemja SMS aser Mobile internet/data services lapoktsü mepishia aru saka telangzüba kecha magütsüi dang aru.
Ajisüaka, tanü nikongdang 5:00 ako meta ka nungi SMS aser Mobile internet/data services ajungbena dang lapoktsüogo.
Tanü putu nung SMS aser Mobile internet/data services ya kanga nüngdak ka kümogo aser talisa kaketshirtem taküm nung iba ya kanga dang tongtipang shilem ka lir.
United Nations Rights Council-ia June 30, 2016 nü internet shibangba mesüra nokdangba linüktem aitsüogo.
2012 nungi UN council-i iba dak sendakba nung telemtetba ana agi aser iba nung nübortem indang ‘digital rights’ kümzüka ayuba indang onük dena lir.