Nagaland nung sorkar school tem tajungba kümdaktsütsü

Kohima, January 15 (TYO): Nagaland nung aliba sorkar school tem tajungba kümdaktsütsü atema sorkari inyakyim ka tenzüktsü sentong lir.
Samagra Shiksha Nagaland-i ayongzükba Shaala Siddhi nung o jembidang Principal Director Shanavas C-i iba osang metetdaktsü.
Nagaland nung sorkar aser nija school tem tsüngda tebendang tulu ka lir. Shaala Siddhi tetezü ya khurettem asadangtsü aser quality education agütsütsü atema lir, ta paisa ashi.
Tesayurtem aser Village Education Committee temi kaketshirtem tajungba kümdaktsütsü atema nangzükba ama inyaktsüla. Iba atema VECs junga len anitsüla aser training agütsütsü nüngdak. School Education Department-i taruba academic session nungi sorkar school tem kanga junga tenük yoka reprangtsü, ta Shanavas-isa metetdaktsü.
Sorkar school temi ajuruba khuret ka nung tesayurtem mapai maruba aser proxy tesayur ayuba lir. Iba khuret koktettsü atema department-i inyakyim ka tenzüktsü. Sorkari state kübok tesem balala nung school tem lapoktsür saka school tem shitak mita maoer. Ano, VECs aser Teacher in charges-i kaketshirtem indang enrollment tai agütsür, ta paisa shisem.
“Taruba academic session nungibo tashimait kaketshirtem nem temulung agütsütsü atema kaketshirtem indang monthly performance bendentsü. Ano, taküm nungi Mid Day Meal scheme ya tashitsütsü melii inyaktsü aser iba atema notice board nung osang agütsütsü,” ta Principal Director-isa ashi.
Iba sentong nung Assistant Managing Director of Samagra Shiksha Nagaland, Liyalo Apon-i okila jembidang “Shaala Siddhi ya National Programme on School Standards and Evaluation (NPSSE) lir” ta ashi.
Shaala Siddhi indang nükjidongji kaketshirtem tajungba angazükdaktsütsü atema lir, ta Liyalo Apon-isa ashi.
Iba sentong ya linük nung school million 1.5 nung inyaktsü aser iba atema School Standards and Evaluation Framework ka yangluogo, ta paisa shisem.
Iba sentong nung mendenji Deputy Managing Director Samagra Shiksha Timothy Thong liasü.