Nagaland nung SP tanutsütila Noklak nung lir

Dimapur, Luroi/August 03 (TYO): Noklak ya Nagaland nung district tanubutisang lir, kong Deputy Commissioner aser Superintendent of Police mezüng shimtetogo.
Aikati Pritpal Kaur Patra tenüng ya mejangja alitsü, shiba Noklak indang SP tasenba alitsü, saka la ya Tuensang nung alirtem asoshi tasen masü, kechiaser taoba mapanga la yangji sub-divisional police officer (SDPO) ka ama inyaka lir jenjang temabai ajungket.
Haryana nungi arishi küm 33 tain, Pritpal Kaur Patra ya state nung SP tem rongnung tanutsütila mesüra tetsür SP rongnung tanutsütila asütsü.
La ya probation nung mezüng Dimapur-i 2019 küm tetenzüklen aru aser Tuensang-i ao aser lai yangji alir dang ‘ozü nübur’ ta ajar.
Nagaland nung aliba nüburtem tenzükba atema aser Noklak nung tongti shilem agitsü lemzüktsüba asoshi lai pelaba olen ka osangbener den lemsatep.
“Ni kodang uniform semdir, ni tetsür ka ta ni amar kechiaser mapa mezüng südaktsür, tetsüra süang mesüra tebura süang,” ta Patra-i ashi.
La ya IPS officer kisüng masü saka certified dentist ka lir.
“Ni dentist ka liasü aser iba wadang nung gold medal nguaka yangji ni temolung masü aser nüburtem yaritsü asoshi ni tali inyaknü,” ta lai ashi.
Lai ashiba agi, lai UPSC tatidang pezüben buba agütsüba nung jenjang 225 nung ajangteta 2019 küm Nagaland-i aru.
“Ni iba tesem mesüra sobaliba kodanga memeteti liasü; yangi iba tesem indang kecha memeteti aru,” ta lai ashi.
“Yangi aliba nüburtem ya backward ta ni kodanga mashitsü. Sempet jenti lir aser Nagaland nung teburtemi tetsürtem akhumtsüpuba ya dangalen alir nisung aikati angazüktsü akok,” ta ashi.
Tuesang district nung coronavirus tashidak wara mapang yakbang sür inyakba sülen iba district aser yangji aliba nüburtem ya lai kanga sapua aküm, ta Patra-i ashi.
Tuensang nung COVID-19 tashidak azüoktsü asoshi la ket nung shisatsü jenti liasü aser Tuensang SP densema nisung aikati la shisatsü aser lai angatetba nung yaritep aser iba ajanga la tali ajungmeso, ta ashi.
La ya arishi küm 25 asüdang kibong akum aser kidang nungi pilar alir asünung kinungertemi aiben mepelai liasü, saka yangi aliba nüburtemi la den temeim kasa lemsateper aser kasa yariteper, aser la mapa mezüng südaktsür, ta laisa ashi.
“Ni anu lanur ka ama ni bilemer aser ozü kibong tuluba akümtsü ibai maongka lir, aser tangbo nu ozü kibong ana lir ta shitet, ta Noklak SP tasenlai ashi.
La ya Nagamese kanga junga jembiteter aser angateter, aser lai ashiba agi, Nagaland nung education system melenshitsü nüngdaker aser temesepba miim mozü amshiba atema temolung agütsütsüla, ta ashi.
Tetsür aser tebur ajak kasa dang aser temolungtetba tulu aser ochi tangatetba den shirnoki meranga inyaker, parnok nem Tsüngremi maongka agüstür, ta Patra-i ashi.
“Iba ama tesem tezülen mapa inyaktsü lemzüktsüba atema ni pelar, kong ni tali tenzüktsü aser temelenshi tajung bener arutsü imlar,” ta laisa ashi.