Nagaland nung SSA Awareness Drive tenzükogo

Dimapur, July 15 (TYO) : July 15, 2016 nü Chief Secretary indang conference hall, Kohima nung Beti Bachao Beti Padhao (BBBP) campaign kübok Sukanya Samriddhi Accounts Awareness Drive tenzükogo.
Iba mapa ya ‘Secure our Girl Child’s Future” omen nung ajemdaker inyaktsü aser sentong nung tongti tesemdangerji Social Security & Welfare & Parliamentary Affairs Minister, Kiyanilie Peseyie liasü.
Nagaland nung State Resource Centre for Women aser Longleng nung District Administration kübok Beti Bachao Beti Padhao maparen takok ngua inyakba atema kanga pelar, ta tanü tongti tesemdanger Kiyanilie Peseyie-i ashi.
Tanur tetsür nem shisaliok agütsüba ajanga parnok tarutsü yanglustür aser asenoki iba scheme nungi tajangzük agi tetsür tanur aika shisaliok ngudaktsütsü merangdi, ta paisa ayongzük.
“Nisungtemia iba mapa nung yariteptsü atema ayongzüker. Asenoki asen jalatem tarutsü asangsang nung tajungba kümdaktsütsü atema ‘Target 2000’ atongtsü merangdi” ta paisa ashi.
BBBP kübok SSA maparen takok ngua inyakba atema Minister Kiyanilie-i State Resource Centre for Women aser Postal Department nem tenüngsang agütsü aser piasa Rural Development, H&FW, School Education, NBSE aser IT department temia iba mapa nung külemi yariteptsü atema ayongzük.
Sentong nung Joint Director & Director of State Child Protection Society Department of Social Welfare, Z. Nyusietho Nyuthe-i okila jembidang, linük tesem balala nung Beti Bachao Beti Padhao (BBBP) maparen inyakba osang metetdaktsü.
SSA-i tetsür tanur  ka indang tarutsü yanglutsür aser ibaji arishi küm 0 nungi 10 tsüngda insurance policy ka lapoktsüba ajanga lir. Iba insurance policy ji la arishi küm 21 ajungba sülen agizüker, ta Nyusietho-i ashi.
Nagaland State Social Welfare Board, Chairperson, Bano Vinito-ia o jembidang, Nagaland nung Save and Educate the Girl Child mapa takok ngua inyakdar aser BBBP scheme tenzükba nungi Project Management Unit aser NSSWB kübok State Resource Centre for Women nungertemi mapa kanga meranga inyakyonga arur, ta ashi.
Sentong nung Department of Posts India Nagaland Kohima Director, R.M. Patel-ia ashiba agi, January 22, 2015 nü scheme tenzükba sülen nungi tanü tashi nung Nagaland nung account 3866 lapokogo.
Tanü agiba sentong nung Assistant State Coordinator, SRCW, R. Juliana Medom-i Beti Bachao Beti Padhao (BBBP) aser Sukanya Samriddhi Accounts (SSA) indang temetettsü metetdaktsü aser System Administration Department of Post, India Nagaland, Kohima-i Sukanya Samriddhi Accounts (SSA) indang metetdaktsü.
Sentong nung mendenji State Resource Centre for Women (SRCW) Mission Director, P. Daisy Mezhur liasü aser Government Departments, civil societies, NGOs, NBCC representatives o Nagaland Mothers Association (NMA) President nungertem aden.