Nagaland nung Street Vendors Act benoktsü nüngdak: Angh

Kohima, Monupii/May 04 (TYO): Nagaland Angh, PB Acharya-i, lenmang nung shishilembartem nem social security aser mapa inyaka taküm alitsü temeden agutsütsü nükjidong nung benokba, Street Vendors Act ya tekaratiba nung Nagaland nunga benoka inyaktsü nüngdak ta shiogo, ta PRO to Governor sangdong ka ajanga metetdaktsü.
Angh-i, lenmang nung shishilembaba ya nüburtem, talisa yimdak yimtsüngtem nungi aonsotsü balala jilai bener arua shishilembar tetsürtem aküm alitsü atema mapa ka lir, aser parnok anema nem shishilembatsü atema shed den tzü tajemtsü aser metsümeshidak agütsütsü nüngdak, ashi.
Paisa lenmang nung shishilembartem dang Street Vendors Act nung lateta alibatem meteta alisüla aser item ozüng benshitsü atema kümküma alitsüla, ta metetdaktsü.
Angh, Acharya-isa, iba Act benokba ajanga shishilembartem tajangzük anguba dang masü saka lijaliyongertem nema service tajung angütsü, ta ashi.
Pai ashiba agi, aonsotsü ayokertemi meyokmaba aonsotsütem pei yimdaki bener oa tasüngnü bener arua ayokba timtem magitsü atema kanga takoksa ngua ayoker, anungji sorkari anogoshia mesüra ita shia para tera agia ki tilala (kiosk) agütsü nungbo mesüra sen dalang agi sefrigerated storage agutsü nungbo ibaji ajanga parnok kanga anisüngzük angutsü.
Aonsotsü ayoker tetsürtem nem ‘kiosk’ agutsütsü atema Metsüremi (March) 14, 2018 nü Angh-i Chief Minister dangi shidi ka züluogo.