Nagaland nung ‘Swachhta Hi Sewa’ tenzükogo

September 11, 2019 nü DC Conference Hall Kohima  nung Swachhta Hi Sewa tenzükba sentong nung PHE Minister Jacob Zhimomi den tangartem agiba noksa angur. 

Kohima, September 11 (TYO): Bodbarnü Public Health Engineering Minister Jacob Zhomomi hopta trok agitsü ‘Swachhta Hi Sewa’ (cleanliness is service) sentong tenzüktsüogo.
Iba sentong ya “Plastic Waste Shramdaan” omen nung ajemdaker agitsü.
Kohima Deputy Commissioner indang conference hall nung iba sentong tenzükdang Jacob Zhimomi-i “merükmejuba ya public maparen ka asütsüla aser iba ajanga lipuküm merüktettsü. Anungji Nagaland tajungba kümdaktsütsü atema nisung shiai shilem agitsü ayongzüker” ta ashi.
“Nagaland sorkari October 2, 2018 nü yimtsüngtem Open Defecation Free (ODF) ta sangdongogo. Iba ya linüki mesangdongdang jelia sangdongba lir aser Urban Development department-ia tema nung metsümeshiba ajanga timtem bener aruba osang prokshitsü imlar aser state ajunga ODF tekaratiba nung sangdongtsüla,” ta paisa ashi.
October 2 matongdang Urban Nagaland ODF alizüng atongtsü atema department-i mapa inyakdar, ta Urban Development Joint Secretary Elizabeth Ngully-i ashi.
Mahatma Gandhi-i India merükmejutsü mangdang ayuba asangsang kümdaktsütsü atema Swachhta Hi Sewa (SHS) campaign-i meranger, ta sentong nung Thangi Mannen-i ashi.
Single use plastics ajanga timtem agütsüba ajiteta, taküm SHS ya plastic waste management omen nung ajemdaker inyaker. SHS 2019 ya October 27 tashi inyaktsü aser iba mapang osang prokshiba den plastic waste bendentsü, ta laisa ashi.
Iba mapang State/UT ajaki loktii shilem agiba sentongtem ayongzüka agitsü. October 1 tashi mezüngbuba shilemji preparatory & Awareness Generation period asüsü, October 2 nü tanabuba shilem nung loktii nübodoka plastic jana bendentsü. Iba anogo ya Mahatma Gandhi sor küm 150 ajungba anogomung asütsü, ta Thangi-i metetdaktsü.
October 3 nungi 27 tashi shilem tasembuba nung jana bendentsü, shimdangtsü aser recycling & disposal atema yoktsü aser iba ajanga plastic free Diwali amungtsü, ta laisa shisem.
SHS 2019 tenüng nung state ajungai ‘single use plastics’ noktangtsü indang tetuyuba agütsütsü. Iba atema Nagaland state sorkaria sangdong ka agütsüogo. Tenokdangbaji Centre sorkari anogo latettsüba October 2 matongdang, September 18 nungi tenzüktsü, ta Thangi Mannen-isa metetdaktsü.
SHS program ya tang inyakba dang masü saka yaküm World Environment Day nung Prime Minister-i 2022 tashi nung India nung ‘single use plastics’ ajak agientsü ta alizüng atongtsü atema iba mapa ya tetenzüker dang lir, ta laisa shisem.