Nagaland nung taila arms licence yangluba atema nisung 5 aitsü

Bhopal, September 10 (Agencies): Madhya Pradesh nung nisung pungui Nagaland nung yangluba taila licence amshiba atema tai tongloktsüogo.
Parnok rongnung Rajput Karni Sena indang Madhya Pradesh unit tir Jeevan Singh Rathore dena lir.
Lok Sabha elections mapang police-i SIT ka tenteter bushisüngdanga aodang iba onük jungkai adok, ta police ketdangser kati ashi.
Model code of conduct kübok nisung ajaki licenced weapons agütsütsü ozüng liasü aser iba mapa inyakdang, police licence aika ngutet aser licence holder aika ozüng alema mapa inyakba ken o tem nung tai tonglokja alirtem liasü, ta ketdangserisa ashi.
SIT-i ita pungu tashi bushisüngdanga arur Jeevan Singh Rathore, Rajendra Tank, Kamruddin Ali, Avinendra Singh Bhati aser Mukesh Prajapat nunger dak tai tongloktsü.
Prajapat ya BJP züngsem ka lir aser Rathore ya Shri Rajput Karni Sena nung state president lir.
Prangpong indang licence tem jangjatsü atema police telok ka Nagaland-i ao aser idangji Rathore aser Bhati na oindang arms licence number temji Nagaland nung local nisungtem nem lemzüktsüba number den kasa liasü, ta SP-i metetdaktsü.
Tanüngba licence asemji khenyongi taila liasü aser Nagaland nung item licence agütsüba kuli kecha maliasü, ta paisa shisem.
Licence temji 2015-16 mapang agütsüba liasü aser iba nung ajemdaker parnoki Ujjain nung alir ka teyari agia Indian Ordnance Factory nungi pistol pezü aser revolver ka ali.
Police-i pistol pezü aser revolver den injang 65 puogo aser par pungu IPC kübok arrla balala nung tai tonglokja lir. Par pungu rongnung Rathore dang mapu lir.