Nagaland nung tan mezüngsüa kou mejepba bejung among

Dimapur, December 22 (TYO): December 19 nü Phek district kübok Meluri jila local ground nung tan mezüngsüa ‘Hair Trimming’ benjung ka mongogo. Iba kou mejepba benjungmong ajanga nüburtem nem jangratem aser anisüngzük bener arutsüogo, ta sangdong ka ajanga ashi.

Meluri tesem nung alir mapa inyaker aser sensopur temi tentetba, Tizu Club-i iba kou mejepba benjung ayongba ya kanga nüngdaka aliba mapang ka nung ayong, kechiba süra tang ya jila nung aliba kou mejeper Bihar nunger anaprongla par yimtaki sodi oa lir aser January 2016 nung ang meyipa arutsü.

“Jila nung kou mejepba dokan aika mali aser alirtemjia sodi ogo anungji onoki jila nung aliba lanur kou mejepertem dang iba sentong nung adentsü asoshi jaok,” ta Tizü Club nung Tir Souvitho Nyusou-i osangbenertem dang ashi.

Onoki jaokba ama nisung 21-i kou mejeptsütsü asoshi tenüng agütsü. Aji oda süaka lia lia nisung aika aruba ajanga nisung kwi kati mejeptsüar mezüngmai aküm, ta pai shisem.

Nisung 120 nungi 130 tashi kou mejeptsü aser bangsemo aongtsü asoshi arua liasü. Parnok rongnung kobangtsüng atsüngtsü asoshia kar arua liasü, ta Club Tir-isa ashi.

Tizü Club ya kümteter ita anabuba ang lir aser parnoki lokti asoshi bendanga agüja inyaktsü nükjidong lir. Iba sentong ya kou angati mejeptsü asoshi liasü ajisüaka kou mejepi arurtemi pei mulungba tenla angütsü meso.

Tizü Club-i iba sentong ayongba ajanga lanurtem dak kou mejeptsü sempet aliba jungkai adoka sayur aser tarutsü nung parnok nem dokan lapoktaktsütsü marendaktsü, ta Souvitho Nyusou-i ashi.