Nagaland nung tang mezüng ‘Zumba Fitness Program’ tenzüker

Dimapur, September 23, 2015 (TYO) : Temang anema alitsü ‘Zumba program’ ya dance-fitness class ka lir, aser iba nung Latin aser international music den yimya balala nung temang arakzüa jangratema tsüngsangba fitness program ka lir, tang alima nung linük 180 nungi tesem 2,00000 dak tema nung nisung million 15 dak temai hopta shia Zumba class agir, ta Zumba tesayur Talien Pongentsur aser CRT Aier nati sangdong ka ajanga ashi.
Zuma ajanga tajangzük anguba aika rongnungi kar- Zumba Fitness ajanga dance party nungi health club-i atsür arur, temulungjang aser azü jajaba junga mapa inyakdaktsür, tanela nung tepela ka alir, mapang tatsü ka nung calorie 1000 aronger, anisüngzükba mapang nunga calorie aronger, temulungjang aser tepokpok tashi itdaktsür, ta tenatisa ashi.
Talien-i ashiba agi, India nung Zumba ya mezüng benokba mapang la Fitness First Platinum Delhi nung aden, aser tanübo lai hopta nung ghonda 12 dak tema tsüngsanger, koba ajanga lai temang toüzük shitak ayur aser süoshi shitak semteter.
“Ni kü class tenzüktsü teti jangra liasü. Nai class ka nung danga dendangra, nai ano arunütsü. Tang mezüngsüa Nagaland nung Zumba fitness tenzüker rongnung adenba atema ni nüma atanger, aser nüburtem anema alibaren nung temelenshi adokdaktsütsü yongyar,” ta lai ashi.
“Ni Nagaland nungi trainer tajung ka bushia liasü aser tatemsa CRT Aier ajurua instructer ama küna tejangraba lemsatepba mapang küna nükjidongji tip ajaklen nungi kasa liasü, aser iba yongji küna senteper temelenshi ka adokdaktsütsü atema bangjem,” ta laisa ashi.
CRT Aier-ia, “Kü maparen, tsüngsangba ser Martial art naprongla nung ni konang nüngsang aser timtem ajuruogo. Kü arishi piyong ni tsüngsanger ka aser Martial Artist ka liasü. Martial Artist ka ama ni Nagaland aser India naprongla tenüng nung asayamung aika nung shilem agiogo. Ni takok aser tamakok naprongla nguogo,” ta shi.
“Tsüngsangba aser Martial Arts ji temelabo masütsü mesüra ajak atema temela masütsü, saka kü nem moatsüba sempet ajanga ni nükjidong ka bushia liasü. Temang anema alitsü aser libaliro tajungba akümtsü atema langka inyaktet asübo ta ni bilema liasü. Ni Talien ajuru aser la daka kasa tejangrabaji liasü,” ta paisa ashi.
“Küna shisa lemsatepba mapang Zumba Fitness, tsüngsangba aser martial Arts ajunga meyokteptsü mulungtep, kechiyong item ajak ya temang anema alibaren nung densema lir,” ta paisa shisem.
Tang mezüng PAWF (Performing Arts with Fitness) project ya ajanga temang anema alibaren awareness sentong ka Dimapur nung October 21, 2015 nü badminton court state stadium nung agütsütsü, aser iba ya Nagaland nung dang masü saka North-east nunga tang mezüng asütsü.
Tejangraratemi https://www.facebook.com/pawfnagaland aser www.pawfnagaland.com. http://talienlapongen.zumba.com nung osang tejangja angutsü mesüra phone no +918258981400 nung tongteprateptsü akok.