Nagaland nung tang mezüngbuba IHM&CT semzük

Dimapur, Luroi/August 30 (TYO): Nagaland nung tang mezüngbuba Institute of Hotel Management & Catering Technology (IHM&CT), tanü Hokolbarnü Darogajan, Dimapur nung Advisor, Tourism, Art & Culture, H Khehovi Yeputhomi-i semzüktsüogo.
Iba Institute ya ali acre 14 nung yanglu aser northeast nung Guwahati aser Shillong na sülen tasembuba jenjang nung lir. Iba ya North East Council aser Ministry of Tourism, Govt of India fund ajanga yangluogo.
Iba sentong nung jembidang Khehovi-i, iba institute ajanga terenlok aser rongsenkettsüng tsütsü state yaritsüa akok, ta teimla nung sorkari kanga tongti süa inyakogo, ta metetdaktsü.
Iba institute amenokba ajanga Nagaland nung tourism aser hospitality industry jenjang tajungba akümtsü, ta pai ashi.
Pai ashiba agi, iba institute amenokba nükjidong ya building tulu yanglutsü atema masü saka investment jenjang junga mapa adokdaktsütsü aser Nagaland nung alirtem nem mapa maongka agütsütsü atema lir.
Director, Toursim, Akhale Vizol-i, mezüngbo iba institute nung sectors pezü- Housekeeping, Front desk, Basic kitchen (Food & Beverages) aser Baking & confectionery nung crash course agütsütsü, aser taruba academic session nungibo IHM ya full-fledged institution ka küma hospitality sector balala nung diploma course agütsütsü, ta metetdaktsü.
Regional Director (NE) India Tourism Guwahati, S.S. Devbarman-i, Hotel management ya technical institution ka lir, aser iba ya ajanga tesem nung tourism ajungkettsüba nung tongti shilem agitsü, ta ashi.
Ministry tenüng nung pai, Ministry-i teyari agütsütsü aser amalitepa inyaktsü, ta nangzük.
Commissioner & Secretary, Tourism, T. Mhabemo Yanthan-i, Naga nunger kin 16 indang chiyungtsü tapu balala jenti lir, aser item ya tangalenia yoktettsü akok, ta ashi.
Paisa, yangi mozü mamshii tsünüba chiyungtsü aser aonsotsü balala lir, aser nutrients shidak aliba chiyungtsüji alimai nüngdaker, anungji asalentong shidak benoka inyakba ajanga asenoki jenjang tajungba alangzüktettsü, ta metetdaktsü.