Nagaland nung TB treatment nung tetsükdaktsü ajurur : TAG; Narendra Modi-i TB tenangzüba meinyakba anema lungkak aiter

Kohima, November 23 (TYO) : Revised National TB Control Programme kübok Central Tuberculosis (TB) Division, Government of India-i September 2015 nung Nagaland sorkar nem sen crore 2,86,06000 lemzüktsüogo saka taküm March ita tashi nung state sorkari sen 1,85,10,000 dang agüja lir.
Nagaland Users Network (NUN) ajanga RTI application ka benokba sülen telangzüba agütsüba nung iba osangji metetdaktsü.
Nagaland nung yaküm tashi nisung 3376 TB treatment agiba tenüng züluoka lir. Tenüng züluoka alirtem rongnung teimbaji Dimapur district nung nisung 1006, Mon nung 491, Kohima nung 409, Mokokchung nung 219, Kiphire nung 148, Peren nung 118, Phek nung 115, Tuensang nung 514, Wokha nung 150, Zunheboto nung 152 aser Longleng nung 54 lir.
Bodbarnü Kohima Press Club conference hall nung NUN-i osangbener senden ka ayongzüka amendang, sorkari state nung TB centre ana- Kohima aser Mokokchung nem senotsü magütsüba ajanga TB agi shirangertem anepaluba nung tetsükdaktsü ajuruba dang masü saka infrastructure nunga timtem ajurur, ta Treatment Action Group (TAG)-i metetdaktsü.
Nagaland Users’ Network-i mapang tatsüka mapa inyaka arudang, Nagaland nung tuberculosis dak sendakba onük aser tayongzükbatem ajanga Revised National Tuberculosis Control Program (RNTCP) indang nükjidong metongtettsü ta asadangtetogo, ta Global Tuberculosis Community Advisory Board (GTBCAB) Member, Ketho Angami-i osangbener dang ashi.
Nagaland nung TB tashidak agi shiranger teimba akümer saka state sorkari teinyaktsü tim meinyakba ajanga RNTCP mapa takok ngua meinyaktettsü ama bilemer, ta paisa ashi.
2001 küm Nagaland nung RNTCP mapa tenzükba sülen District TB centres 11, Designated Microscopic centres 44, Directly Observed Treatment centers 929 aser Drug resistance TB centers 2 (Khuzama aser Mokokchung) lapokogo, ta Ketho Angami-isa ashi.
Kohima, Zunheboto, Mon, Tuensang, Mokokchung aser Dimapur nung TB diagnosis atema state nem CBNAAT machine 6 agütsüogo, saka Tuensang o Zunheboto nung iba kol ano mamenoki lir. District ana nung infrastructure shitak maliba ajanga koltemji mamenokteter anungji state sorkar aser bangdak department-i December 1 tashi nung Tuensang aser Zunheboto nung CBNAAT machine tem amenoktsü imlar. Iba mapaji meinyakra NUN aser TAG nati lungkak aita mapa inyaktsü, ta Ketho-isa metetdaktsü.
TB kanga bulua adokba district anaji Dimapur aser Tuensang na lir aser Kohima ji ‘high TB with HIV district’ ta züngshir. Ajisüaka, Peren bo ‘high drug resistance district’ ta züngoker. Anungji, Nagaland state RNTCP-i civil society teloktem dang nungi teyari agia TB program mapa inyaktsüla, ta paisa shisem.
Yashi Kohima nung Nagaland Users’ Network-i Partner NGOs den consultation workshop ka ayongzüka agi. Iba sentong nung tongtibang onük kar benokbaji – mobile TB screening maliba; Tuensang ama TB tashidak kanga bulua adokba tesem nung CBNAAT maliba aser anti tuberculosis treatment atema shirangertemi temulung magütsüba tem liasü.
TB program nung arogoi shilem agitsüla kechiyong ibaji ajanga mapa inyakba nung temelenshi tulu angutsü aser meta talanglang pilar aliba tesemtem nung TB treatment indang osang tejangja proktsü nüngdak, ta consultation workshop nung jembi.
Ano, külen State TAG on TB-i Prime Minister Narendra Modi-i TB tenangzükba meinyakba anema sentong ka tenzük.
India-i TB wara koktettsü atema mapa shitak meinyakba aser Revised National Tuberculosis Control Program (RNTCP) nung teinyaktsü asalendong 9 tashi lateta ayuba meinyakba anema State TAG on TB-i iba lungkak aitba sentong tenzük.
Tanü osangbener senden nung India Country Coordinating Mechanism (CCM) -Global Fund member Abou Mere, Vihan HIV & TB Coordinator Visevinuo Khrieo aer Kohima Network of People Living with HIV and AIDS, President Yhuni Kesen nungertem dena liasü.