Nagaland nung teintet rogotem anogo amung

October 1, 2015 nü Zonal Council Hall, Kohima nung ‘International Day of Older Persons’ anogomung nung Retired Chief Secretary, Nagaland,  Alemtemshi Jamir-i jembiba noksa nung angur. 

Kohima, Oct. 01 (TYO): Tanü ‘International Day of Older Persons’ anogomung nung Nagaland nunga arishi küm 60 ser temapurtem tushia health walkathon densema tetushi sentong balala agiogo.
Tanü Kohima nung Department of Social Welfare-i ayongzüka “Sustainability and Age inclusiveness in the Urban environment” omen nung iba anogomung sentong nung tongti tesemdanger o jembidang, taoba Chief Secretary, Alemtemshi Jamir-i, “Arishi tainba akümba ya tebilemtsü ka masü saka takok anguba lir,” ta ashi.
Paisa senso taintemi pei kibong aser lokti nung parnoki agitettsü tongtibang shilem indang lemsatep. “Khenkhenbo taintem ya lokti nung khuret ka ama agir, ajisüaka tangbo parnokji kanga senti süa züngshir,” ta ashi.
“Lokti ajak nung teintet rogotemi lokti tenzüker ka ama shilem agiba dang masü saka lenirtem aser mulungteta nübu agütsürtem ama shilem agir. Aiben parnok dak shisatsü, loktiliba puti otsü, sobaliba aser libaliro sentiberem rizünga lir, koba ajanga lokti ka maitsü nung tongtibang shilem agir,” ta pai ashi.
Pai ashiba agi, alima tesem ajaklen meimchir arishi talangba akümer. 1950 küm nungi nisung ka asoba mapang arishia alitsü kümji küm 46 nungi 66 tashi liasü, aser Nagaland nungbo arishi küm 75 lir.
“State loktiliba aser rongsenkettsüng terenlok nung parnok nem-a shilem agidaktsütsü asoshi asenoki mapatong kar apiteta inyaktsüla. Nüburtem arishi talangba aliba dang masü saka parnok taküm libaliro tajungba akümtsü asoshi asenok senteper inyaktsüla,” ta paisa shisem.
Tanü iba sentong nung OSD Social Welfare, Kewe-ü Kenye-i anogomung omen teratet lemsatepa liasü.
Iba anogomung nung arishi küm 80 ser temapur ana- Nagaland Prayer Fellowship Tir, Beilieü Shüya aser Naga Baptist Association General Secy., Reverend Dr V K Nuh na nem senior citizens award agütsüogo.
Social Welfare Under Secretary, Sharon Longchari lenisüba nung agiba sentong nung Rengma Baptist Church Sannüker, Dr. Kenny Tsela-i sarasadem, CBC Ministers’ Hill nungi Akhro Koza & Adeno Hibo nati temeja ken ka aten aser Social Welfare Director, T. Merangtsungba Aier-i tepela anküp o jembia liasü.