Nagaland nung telok balalai Manipur nung azütokshitepba aitsür

Dimapur, May 5, 2023 (TYO): Nagaland nung Arogotem dena telok balalai Manipur nung azütokshiba aitsüogo aser yimjung bener arutsü tayongzükba agütsür.

Naga Hoho-i sangdong ka nung lendong balala atalokba aser tapayutsü takümtem samaba den kiojentem raksatsüba atema süoki ia bilemba metetdaktsü.

“Manipur state sorkari ‘shoot-at-sight’ tetuyuba agütsüba aitsür kechiyong iba nung lendong tulu keta lir. Tashiyim amshiba ajanga tensa tamajungba akümtsü aser azütokshi talila ataloktsü. Anungji state sorkari tensa süngjemtsü atema iba tetuyuba meyipa agitsü ayongzüker” ta Naga Hoho-i ashi.

“Manipur nung tai maketertem dak teka sangshiba aser talisa Khristantem tepsetba, tenla kitem rongdoktsüba aser nija kitem raksatsüba aitsür” ta Ao Baptist Arogo Mungdang (ABAM)-ia sangdong ka nung metetdaktsü.

“Iba inyakyim ajanga tamangba yimsü aser lokti nung meputep tali adoktsür anungji yimjung nung alitsü ayongzüker. Tamangba yimsü ka aser kin ka samatsütsü atema inyaksangshiba angudang temulung raksar” ta ABAM-isa ashi.

Christian Forum Dimapur (CFD)-ia tanga sangdong ka nung tai maketertem dak tenük yoka mapa tamajung inyakba aser pei tamangba yimsü aser kin atema reshikangshiba atema temulung raksaba metetdaktsüogo.

Manipur nung ozüng alema mapa, inyakba nisung tepsetba aser tashiyim mapa inyakbatem aitsür. Tamangba yimsü amangtsüba ya meimchir temeten ka lir aser tamangba yimsü nung ajemdaker inyaksangshiba ya magizüker ta CFD-isa metetdaktsü.

Tenla aika rongdoktsüba aser raksatsüba atema temulung raksar. Centre aser Manipur state sorkartemi tanga iba mapa ya azüoktsü ayongzüker, ta parnokisa ashi.

Naga People’s Movement for Human Rights (NPMHR)-ia nisung tepsetba aser ozüng alema mapa inyakba anentsü ayongzükogo.

Lokti lennirtem aser MLA temi tensa süngjemdaktsütsü aser sendaktepa alirtem den olemtep tenzüktsü ayongzüker, ta NPMHR-i sangdong ka nung ashi.

Nisung taküm samaba atema mang ayimer aser lokti nung telemsa adokba atema sasa bilemer, ta NPMHR-isa ashi.