Nagaland nung tetsür aluyimertem ajungkettsü meranger

Kohima, October 15 (TYO): International Day of Rural Women tenüng nung Hombarnü Mahila Kisan Adhikar Manch (MAKAAM) Nagaland chapter-i Nagaland Women Farmers’ Convention ayonga mongogo.
Iba mungdang nung tetsür aluyimertem ajungkettsü aser yimtsüng tia nung aliba tetsür aser aiürtem tashi itdaktsütsü indang onüktem benoka lemsatep.
Tetsür aluyimertemi state aser linük atema chiyungtsü tsünür saka parnok chirnurtembo achiajem shitak mengui timtemer ta MAKAAM NFT züngsem Rukmini Rao-i ashi.
Nagaland nunga Council of Women Farmers ka tentettsüla aser iba ajanga sorkar dang tetsür aluyimertem yaritsü indang tebilembatem lemsateptsü, ta laisa ashi.
Yimtsüng nung tetsür aluyimertemi infrastructure development kija dangbo menüngdaker. Tetsür aluyimertemi yimtetba ayutsü atema storage facilities, shishilembatsü, khu abentsü atema gari aser loan teyaritem sorkari agütsütsü, ta Rao-isa ashi.
Linük ajunga atema chiyungtsü anepaludang, tetsür aluyimertemi pei kibong atema-a achiajem peria angutsü atema bilema inyaktsüla, ta laisa ayongzük.
Sentong nung Principal Secretary to Government of Nagaland (Agriculture), N. Hushili Sema-i o jembidang “Nagaland nung aluyimba wadang nung tetsür 70% lir. Naga tsürtemi aluyimba maparen inyakba atema tenüngsang agütsür” ta ashi.
Sorkar tenüng nung lai “Department-i tetsür aluyimertem nem temulung agüja mapa inyaktsü” ta ashi.
MAKAAM Nagaland züngsem Khesheli Chishi-ia ashiba agi, yimtsüng nung aliba tetsürtemi yimtsüng aser jila nung alir ajak atema chiyungtsü agütsüba nung tongti shilem agir.
India kübok yimtsüng tia nung alir tetsür 80% dak temai aluyimba mapa ajanga pei taküm mesür. Nagaland nung aluyimertem aser talisa tetsürtemi sobaliba yimya nung aluyima aruba mapa ajanga tsünüsebongtsü wazüka ayur, ta Chishi-isa ashi.
Nagaland kübok tetsür aluyimer aika lir saka nübortemi parnoki inyakba mong majiteter. Wadang aika nung tetsürtem tejakleni oaka, yimtsüng nung aliba tetsür aser aiürtemi tangutsü tim aika mangur, ta laisa shisem.
Iba atema Nagaland MAKAAM-i tetsür aluyimertem aser sorkar tsüngda apu alar ka ama yariteptsü alizüng yur mapa inyaker, ta Chishi-isa metetdaktsü.
World Food Day nung shilem ka ama, MAKAAM Nagaland-i asüngnep 6:00 ako nungi High School junction Kohima nung Women Farmers Market lapoka amentsü.