Nagaland nung tetsür nem tetemlok magii sen aputsür

Kohima, March 26 (TYO) : Nagaland Department of Women Resource Development-i tetsür nem sen tetemlok kecha melii sen aputsüba indang scheme asem ketdangsüa inyaker.
Iba mapa ya Chief Minister Self-Employment Programme kübok tetsür entrepreneur tem ajungkettsü atema inyaker.
Department-i tang tagidak assembly nung agütsüba annual administrative report nung ashiba agi, Promotion of Women in Innovative Enterprises Programme ajanga tetsür nem sen lakh 5 tashi tetemlok melii aputsür.
Tanabuba scheme ji Women Entrepreneurial Development Initiative lir aser iba ajanga yimtsüng tia nung aliba tesemtem nung private enterprise tenzükba tetsür nem sen lakh 2 teyari agütsür.
Tasembubaji, Micro-Enterprise Development Scheme lir aser iba ajanga kinungbo den balar aliba tetsürtem, amitsürtem, kija alirtem, senzüka yutsürtem mesüra rara ajanga lajar kümdaktsüba tetsürtem nem teyari agütsür.
Iba scheme kübok tetsür nem sen meyirjang 10 nungi 30 tashi teyari agütsür, ta Nagaland nung Women Resource Development Department-isa metetdaktsü.
Maneni, parnokisa Mokokchung aser Phek district kübok Chozouba nung Women Resource Centre tem lapokba osang metetdaktsüogo.
Taküm küm tsüngda nungsa Centre tem nung mapa tenzüka aotsü, ta annual administrative report nung shia lir.
Nagaland nung yimtsüng tia nung aliba tesemtem nungi tetsür teimbaka aluyimertem dang lir aser parnoki alu nung dang masü saka parnoki tsünütetba yokdoktsü atema shishilembadak tajung nüngdaker, ta report nungsa metetdaktsü.
Parnoki jilatem talisa Kohima aser Dimapur nung shishilembatsü atema lenmang talanglang senzür, ta Women Resource Development Department-isa ashi.
Parnokisa ashiba agi, tanü asüng technology kanga kara ainba ajanga, yimtsüng tia nung aliba tetsürtemi jila aser yimtitemi oa mapa bushir. Ibaji dang masü parnoki skills aser tanga shishilembaba yimya balala angazüker.
Yimtsüng tia nung alirtem nem maongka agütsütsü atema Women Resource Centre tem lapoktsür aser maneni Zunheboto, Wokha aser Peren district tem nunga lapoktsü, ta department-isa metetdaktsüogo.