Nagaland nung teyari balaka nüngdakba tanurtem asoshi RAISE NE tenzükogo

Kohima, April 12 (TYO): Nagaland nung Mongulbarnü Regional Action on Inclusive Education (RAISE) North East tenzükogo.
Sarva Shiksha Abhiyan maparen den yaritepa Assam, Nagaland, Meghalaya, Manipur aser Tripura state tem nung sorkar aser sorkari teyari agütsüba school tem nung shi aser tekolok agi tangar memenepba kaketshirtem shisaliok bushibaren nung yariteptsü atema RAISE North East mapatong ya tenzüker.
Iba mapatong ya International agency asem- Christoffel Blinden Mission (CBM), Light for the world aser Liliane Fonds nungertemi yariteper aser NGO 15-i state pungu nung mapa inyaktsü.
Tanü Social Welfare Department Secretary, Dellirose M Sakhrie-i RAISE Nagaland tenzüktsü.
Dellirose-i tongti tesemdanger o jembidang, nübortem dang shi aser tekolok agi tangar memenepba nisungtem mesenmetua mamshitsü ayongzük.
Nagaland nung ‘people with special needs’ 29000 shi lir aser asen loktiliba nungi parnok mesenmetua amshiba tangatetba agientsüla. Parnok tashi itdaktsütsübaji sorkar khuret dang masü saka nisung ajak indang tebilemtsü khuret lir, ta laisa ashi.
Iba sentong nung RAISE NE Director, Bibhu Dutta Sahu-i RAISE indang temetettsü metetdaktsüdang, RAISE indang nükjidong tongtibangtibaji teyari balaka nüngdakba tanurtem kechisarena ajaklen ajungkettsü atema lir, ta ashi.
Nagaland nung RAISE maparen asoshi teyariteperji Cherry Blossoms Society lir aser parnok Administrator, Purnima Kayina-i ashiba agi par Society-i sorkar mesüra SSA school teshimtet kar nem technical support agütsütsü.
Cherry Blossoms-i Kohima nung SSA kübok school pungu den yariteptsü aser itemji GMS Aradura, Tsüpfü Tsepfü Primary School, Lerie Chazou CWSN, GMS Porterlane aser GPS PR Hill nungertem lir.
Iba sentong nung Kohima Deputy Commissioner, Rovilato Mor aser teyari balaka nüngdakba tanurtem tsürabur kari parnoki ajurushiba lemasatep.
RAISE NE ajanga teyari balaka nüngdakba tanurtem nem shisaliok tajungba agütsütsü imlar, ta SSA Kohima District Inclusive Education Coordinator, Cecilia Vizo-ia metetdaktsü.
Sentong nung D. Adani-i tesentepertem pela agizük, Cherry Blossom School o Tabitha Enabling Academy nungi kaketshirtemi ken aten aser Zeneilenuo Solo-i anküp tepela o jembi.