Nagaland nung totzü aser gas agitetba mapa meinyaktetter

Kohima, Nov 24 (TYO) :  Nagaland government-i latetba “Nagaland Petroleum and Natural Gas (NP&NG) Rules and Regulation, 2012” ya central government-i linük temzüngi memelar ta metetdaktsüba ajanga state nung totzü bushia atsüteta agitsüba mapa menua metenzüktetter ta Chief Minister T R Zeliangi metetdaktsü.

Tanü Brehostibar nü Nagaland tatar senden nung ken o lemtepba mapang, Nagaland nung NP&NG Rules & Regulation mapa küma meinyaktetba indang metetnüa asüngdangba ken o ka langzüdang, ” High Court-i state government-i latetba ozüng mapa küma meinyaki atatsü asoshi nokdanga lir, kechiyong state dak totzü aser gas dak aketva temzüng ozüng yanglutsübo ashi mali ta obendangertemi bilemer,” ta chief minister, T.R.Zeliangi metetdaktsü.

” Central government-i NP&NG Rules and Regulation 2012 ya linük temzüng anema latetba ozüng lir ta metetdakja lir, iba jagi asenoki asen lima nung aliba totzü aser gas-tem ya bushia mapa metenzüktetter,”  ta Zeliang-isa ashi.

Ajisüaka, state government-ia kasa ken  o anema okadak ken o agütsütsü aser tatem tashi nokdaktsü ta Chief minister-isa metetdaktsü.

Kasa senden nungsa, Parliamentary Secretary for PWD (Housing) Levi Rengma aser MLA Mmhonlumo Kikon  nati Parliamentary Secretary in-charge of Geology & Mining, Imtiwapang Aier dang Lotha nunger lushi nung Lotha Hohoi okadak ken o agüja aliba ajanga totzü bushia agitetba mapa meinyaktetaka, kechiba  Mokokchung aser Mon district nunga  NP&NG Rules and Regulation 2012 ozüng ya mapa küma meinyaktetter ta asüngdanga liasü.

Iba o ji langzüa ashidang, Nagaland government-i totzü aser gas bushia agitettsü atema latetba ozüng NP&NG Rules aser Regulation  ya Naga nunger nem temeten agütsüba linük arla 371 (A) nung ajemdaker latet saka central governmenti Nagaland tatar senden nem totzü madak tashi amshia ozüng latettsü tashibo agüja mali  ta ashiba ajanga tang tashi mapa makümer ta paisa metetdaktsü.

Aji oda, tang okadak kasa ken o nung Lotha Hohoi benoka aliba ken o jibo center sorkari ashiba den kasa, anungji shisa kaa mejembira, Northeast nung aliba kintem kanga akoksatsü ta paisa  tekümdangtsü o ka ashi.