Nagaland nung totzü tsütsü terenlok mapa inyaktsü state dak tashi mali: Union ministry

Mokokchung, November 11 (TYO): Nagaland nung totzü tsütsü terenlok mapa inyaktsü aser ozüng yanglutsü asoshi state dak khenyongi tashi mali, iba nung yabo parliament dak dang temeja tashi lir, ta Ministry of Petroleum and Natural Gas (Govt. of India) nungi iba onük dak sentakba nung telangzüba shiti (counter affidavit) ka yoka lir, ta osang tejangja ka ajanga angazüker.
Iba telangzüba ya, tang koba Nagaland nung totzü tsütsü telok kari Public Interest Litigation (PIL) keno ka Guahati High Court Kohima Bench nung benoka lir, iba dak sentakba nung Ministry of Petroleum and Natural Gas-i telangzür (respondent) ka ama langzüba lir, ta jangjaogo.
Totzü dak sentakba nung ozüng yanglutsü asoshi India temzüng kübok Nagaland state asoshi yanglutsüba Article 371 (A) yagi parliament dak kecha agia malener aser parliament-i totzü tsütsü ozüng yanglua aliba nunga Nagaland state-i bangzüng balaka yanglutsü kecha menüngdaker, ta Union ministry-i okadak langzüba shiti nungji shia lir.
‘Nagaland nung totzü tsütsü terenlok mapa inyaktsü asoshi ozüng yanglutsü Nagaland state dak tashi lir ta asübaji magizüker’, ta kasa shiti nungji shia lir.
Nagaland state-i totzü dak sentakba nung ozüng kechisa yanglua ali, ibaji tazüngla ka dang masü saka India temzüng anema lir, ta iba shiti nungji kanga jangja shia lir.
Tanü iba osangbeneri Parliamentary Secretary for Geology & Mining, Dr. Imtiwapang Aier den jembidang, iba keno ya okadak ajanga masü saka yimden ajanga (politically) dang jembitepa telemtetba agitettsü, anungji, iba dak sentakba nung “nüburtem ajak lungjemer state sorkar nungittsüla”, ta paisa inyakdaktsünüba olen ka ashi.
Nagaland nung totzü dak sentakba nung koba keno (PIL) benoka lir, ibaji ajanga iba keno ya tasakba aser temangmangtsüka küma odagi, anungji, “nüburtemi ibai ano khen kanga junga aser aroka shisadangtsüla aser ibai agienba tajungba asütsü”, ta pai tebilemba ka ashi. Aji mesüra, “Arla 371 (A) nung aliba temetenji asenok asoshi nüngdak mali akümtsü”, ta paisa tekümdangtsü olen ka ashi.
State sorkari Arla 371 A nung ajemdaker Nagaland Petroleum and Natural Gas regulation & rules ta sür 2012 küm totzü terenlok dak sentakba nung ozüng kar yanglua kar, anungji, “asenoki iba temedenji kümzüka aser wazüka ayutsüla”, ta paisa ashi.
PIL nungji temeden dak sentakba nung tim masüba onük kar lir aser ibaji Naga nunger asoshi tetsükdaktsü tulu asütsü, ta paisa PIL nungi onük kar tuteta ashi. Totzü dak sentakba maparen nung temulung masüba mesüra tebilemba kar danga lira, telemtetba tajung agitsü asoshi yariteptsü mulunga lir, ta paisa shisem.
Tang PIL koba okadak tejembidak lir, iba dak sentakba nung Nagaland sorkaria yakta telangzüba agütsütsü renemdagi, ta paisa ashi.