Nagaland nung Tourist Police tenzüktsü

Kohima, Yimpoksüi (November) 17 (TYO): Nagaland nung Hornbill Festival tenzüktsü anogo 13 dang anünga lia Police aser Tourism Department temi Tourist Police tenzüktsü atema kanga meranga mapa inyakdar.
November 19 nungi police personnel 73-i anogo pungunü training agitsü aser iba atema tanü PHQ nung inaugural session agi.
Police temji 15th IR (NAP) Mahila Battalion nungi 50 aser Kohima DEF nungi 23 lir.
Naga nunger ya yimya awashi metetba atema tetshir aser Tourist Police tenzükba ajanga asen sobaliba takar tajungba yanglushitsü. Iba ajanga tourist tem pela agizükba aser lendong nungi kümzüka ayuba nung teyari angutsü, ta DGP Nagaland T John Longkumer-i ashi.
“Asenoki tourist tem atema aria bilemer aser parnok timtem kecha melii Nagaland nung jangratema mungdaktsünür ta alima dang sayudi” ta paisa ayongzük.
DGP Nagaland-isa Senior SP Kohima dang benjung mapang yi jemertemi timtem agütsüba azüoktsü aser aibelenertem ozüng tapet agi merenshitsü atema tetuyuba agütsü.
Training sentong nung aliba agi November 23 nü Chief Minister Neiphiu Rio-i Tourist Police tenzüktsütsü.
Taonung agiba sentong nung Additional Director (HOD) Tourism, Akhale Vizol-ia o jembidang, north east state tem nung tourist police tenzüktsübaji Nagaland tanabuba asütsü, ta ashi.
Nagaland nung tourist tem dak ozüng alema mapa inyakba mesüra timtem ajuruba mali saka lendong nungi jenbua lidaktsütsü atema iba mapa ya inyaker, ta laisa ashi.
Nagaland nung Tourist Police tenzüktsüba ajanga tourist tem teyari tulu angutsü aser parnok temulung anisüngzüka amungtsü, ta Tourism Secretary T. Mhabemo Yanthan-ia ashi.
Tourist Police ya Railway Station Dimapur, Airport, Chumukedima Check Gate aser Kohima nung sector 12 nung mapa lemzüktsütsü, ta Tourist Police, IGP (Range), Sonia Singh-i ashi.
Tourist Police atema 24×7 integrated control room ka den grievance redressal mechanism dena lapoktsü aser ibaji police personnel aser tourism officer nungertem dena nisung 12-i ketdangsütsü, ta laisa shisem.
Tourist Police atema gypsy ana aser motor cycle tem agütsütsü aser iba den control room den sendaktepba SOS call app ka densemtsü, ta ), Sonia Singh-isa metetdaktsü.
Training nung Tourist Mannerisms, Etiquettes, Orientation on security & safety of tourists, Orientation on various regulations (ILP) tesayubatem den Nagaland Tourism Association, All Nagaland Taxi Association o Hoteliers & Restaurant Union nunger den sensaksemtsü.
Taonung agiba sentong nung mendenji Kohima SP Vekhosa Kotso liasü.