Nagaland nung train senzütsü

Alima nung nisungtem melamelaa oli aruli senzütsü asoshi ali nung gari, tzüyim nung rong aser anünglen tayimtsü senzür. Ibaji nisungtem asoshi anisüngzük tulu lir. Ajisüaka, item ajak madak train ya mali asünunga nisungtem paika den chiyongtsü, osettsüset aser totsü ya kong kechikomaka bener senzüla ta bilemer. Aji oda, gari, rong aser tayimtsü aliyonga nisung teimbaka train nung dang senzür aser shi ango, jangotsü kisüjensüba oset aser gari nung atsüktsüba totzü ajak ya train nung abenba agi jenjang temelaba nung ayoktsü akoker aser nisungtema sen aika meindoki tesem ka nungi ka atonger. Tatishitsü ka, tang asenoki chiyongba jang ya tayokdak lima nungi gari nung  bener aru asübo tang dang nungi anasü agi jenjang tasakba süla. Iba kasaji alo, beas aser cement jenjang tang dang nungi kanga agia tasakba asütsü. Ibaji dang masü saka train mali asübo asenok aika bendanglima talangi tazüngi mesüra taneptsü bushia moutettsü. Item temoatsütemji asenoki reprangtetra asen lima nunga train senzütsü asoshi asenok ajaki temulung agüja inyaktsü. Tang tashi nung train agi Nagaland ajangbaji Dimapur ya dang lir aser ano tang Rangapahar, Dimapur nungi Zubza tashi train atutsü asoshi taküm November ita nungibo mapa tenzüktsü ta North East Frontier Railway nung ketdangsertem tonga aruagi Nagaland chief minister dang ashiba osangji asenok ajak asoshi tepelatsü osang lir. Asen lima nung train senzüba ajanga jenjang temela agi nisung amentsü aser khu abentsü ta asüba tajangzük dang masü saka Railway nung inyaktsü asoshi lanurtem aika mapa angutsü aser ano railway station nung dokan lapoktsü maongka angtsü. Tang Dimapur tashi train aruba yagi Railway nung mapa inyaktsüsa Naga nunger lanurtem kecha balaka maongka mengui alitsü südi. Ibaji dang masü Dimapur Railway station nung dokan  aser süngojemdak semtu ajak kibur tenüngbo Naga nunger saka tamenerbo tsümartem dang angutsü. Ibaji asenok asoshi kanga takoksa lir. Asenoki tamalen aiben Assam aser Bihar nung lisopurtemi Railway nung mapa inyaktsü asoshi lisopurtem nem shilem balaka shiteta yutsütsüla ta takangba agüja longkak aitba angashiogo, züngogo aser tangua nguogo. Aji oda, parnokbo parnoki akangba ama maongka ngudagi saka asenokibo takanga makanger anungji tangua mangur. Joko asenokia tangar inyakba angur asünungji asenok tangutsü aliba shilembo reprangteta agitsüla aser tangar ama teinyaka meranga aser nendaka inyaktsüla. Dimapur sülenbo Nagaland telongi train atutsü lenmang lapokbaji Tuli liasü. Ajisüaka, paper mill anenadokba agi train a dena mesenzüi küma adok. Ibaji asenok lenir aser nüborten na prongla nisung memesük wainshin maliba agi lir. Tuli tashi train atutsübaji paper mill kisüng atema masü saka paper maliyonga nisung senzütsü aser khu abentsü asoshi Jorhat aser Amguri nungi Tuli, Changtongya Chuchiyimlang aser Impur ajanga train agi Mokokchung tongra idak nung jagi Tuensang melamelaa atongtsü aser Mariani lenia lutettsü. Ano. Amguri o Mokokchung na tsüngda nungi Longleng tashia railway lenmang yanglutettsü. Aji oda, kodang gari lenmang agi dang masü saka train lenmang agi Nagaland tesem ajaklen tongdir, idangjiang Nagaland nung rongsen apoktsü. Tangbo Assam ajanga gari nung aou aser süngküm mesüra ali mijang aser süng bener aotsü kanga tasak, saka itemji train nung jenjang dalangba agi melamelaa bentettsü. Item ama nübortem anisüngzük angutsüba mapatem nung yimsüsür aser nübortemi temulung agütsütsüla.