Nagaland nung Tribal Affairs Department nüngdaker: Director NSTFDC

Kohima, Monupii (May) 4 (TYO): Union Ministry of Tribal Affairs ajanga Nagaland nem senotsü teyari aika agütsür anungji Nagaland nung Tribal Affairs indang department balaka tentettsüla, ta National Scheduled Tribes Finance and Development Corporation (NSTFDC) Director, Johnny G Rengma-i ashi.
Ministry of Tribal Affairs-i lisopurtem aliba tesemtem renlokdaktsütsü atema senotsü teyari agütsür aser Nagaland-ia sen aika angur, ta pai ashi.
Nagaland nung tribal hostel tem yangluba dak alaka sorkari tanga scheme tem atema teyari memeshir. Nagaland nung tribal affairs department mali aser Planning Department tentetba sülen nungi parnoki dang tribal affairs senotsü ketdangsüa arur, ta Johnny G Rengma-isa metetdaktsü.
Ministry of Tribal Affairs-i NSTFDC ajanga nisungtemi entrepreneurship inyaktsü aser state indang rongsenkettsüng ajungkettsü atema sen lakh 1 nungi 25 tashi nisung ka nem sen aputsür, ta paisa shisem.
Tsüklai 2, 2018 nungi Ministry of Tribal Affairs nung NSTFDC, New Delhi indang Board of Directors nung non-official director inyaktsü atema Johnny shima liasü.
Paisa, state sorkar dang Nagaland Industrial Development Corporation (NIDCL) ajanga entrepreneurs nem 6% per annum nung sen aputsütsü atema senotsü teyari agütsütsüla ta ayongzük.
Sorkari NIDCL nem senotsü teyari magütsüra aser entrepreneur-i sen apuba meyipa magütsüra süadoktsü, ta paisa shisem.
Nagaland nung entrepreneurship ajungmsotsü atema Confederation of Indian Tribal Entrepreneur, Nagaland Chapter-i StartUp India programme den mesüktepa Monupii (May) 7, 2018 anepdang 11:00 ako nungi Hotel Japfu, Kohima nung sentong ka agitsü ta paisa metetdaktsü.
StartUp India programmes atema nodal department ji Industries and Commerce Department lir aser iba department-i self-employment sünürtem nem senotsü teyari agütsütsü aser yaritsü.
Industries and Commerce Department Nagaland kübok Confederation-i mapa inyaktsü aser register süa aliba entrepreneur tem nem senotsü teyari agütsütsü, ta Johnny-isa ashi.