Nagaland nung tzümetsüng aser anentsüh agi timtemer; Neiphiu Rio-i Narendra Modi dang teyari meshir

Nagaland kübok Dimapur nung tzünglu kanga aruba ajanga Bodbarnep tesem aika tzü agi metsüngbangba ajanga nübortem timtem jenti ajuru. Tzü metsüng agi kanga mejungi kongshiba tesemtemji- Walford, Nagagoan, Sachu colony, Zeliangrong village, Nagarjan, Burma camp aser Super market area liasü. Ajisüaka iba lendong nung nisung taküm samaba osangbo kecha maliasü.

Dimapur, Luroi (August) 1 (TYO): Nagaland Chief Minister, Neiphiu Rio-i India Prime Minister Narendra Modi dangi shidi ka züluba nung tzünglu kanga aruba ajanga takoksa bentsür aruba osang metetdakja lir.
State kübok tesem balala nung anentsüh aluba aser ali anenoka aiba ajanga public infrastructure raksatsüogo aser nisung taküm den rongsen akoksaogo. National aser State highways anenbangba den külemi district connectivity roads aika nung mesenzüteter, ta Rio-i shidi nung shia lir.
Nagaland nung road communication aser connectivity nung timtem tulu ajurua lira ser Manipur den sendaktepba NH 29 nunga joko anogo ishika gari mesenzüteti timtemer. Iba den külemi power lines aser communication networks aika raksaogo aser district headquarters dangi tang nüngdakbatem agütsütsü asoshi tetsükdaktsü ajurur. Talisa Kiphire-i aoba lenmang ajak anenbanga lir, ta Rio-isa Modi dangden khuret lemsatep.

Nagaland kübok tenemlen anentsüh aser ali anenoka aiba ajanga kibong aika talidak maka kümogo aser nisung karbo tzü agi ponger ao. Ano, tenemtsüng aser lendenlen tzümetsüng ajanga takoksa jenti bentsür aruogo aser colony ajunga den yimtsüngtem tzü agi metsüngbanga lir, ta paisa ashi.
“Nagaland nung local media-ibo lendong osang bushia sangdonger saka national media nungbo iba dak sendakba osang kecha mesangdonger. Iba jagi nü dang Nagaland nung tang ajurua aliba tensa indang osang metetdaktsür” ta Rio-isa Modi dang ashi.
Nagaland Disaster Management Authority den yaritepa sorkar department aser teloktemi infrastructure yanglutsü aser relief & rehabilitation mapa inyaktsü merangdar. Nagaland ya tesentaktep takang aliba loktiliba ka lir aser iba jagi sensotemia sorkar den yariteper. Ajisüaka, tang ajurua aliba khuret ulura asünung, state sorkaria dangbo meinyakteter kechiyong onok ket nung rongsen, kol aserr osettem peria mali aser connectivity-a majung, ta Rio-isa shidi nung shia lir.
State sorkari teraksa anguba aser lendong atalokba osang ka renemdar saka ketdangsertemi anogoshia timtem balala ajurur. Item khuret atema Nagaland state sorkari interim Central assistance agütsütsü aser Centre-i state den yariteptsü mepishir, ta Rio-i PM Modi dang ashi.