Nagaland nung ULBs atema candidate 156-i tenüng agütsüogo

Kohima/Mokokchung, January 05 (TYO): Nagaland tesem balala nung urban local bodies (ULBs) election atema candidate ajak agi parnok 156-i tenüng agütsüogo; tanü tasembuba anogo nung parnok nisung 85-i tenüng aguja liasü.
Iba election nung shilem agitsü atema tenüng agütsütsü asoshi tatembangbuba anogoji January 7 nü lir. Candidates 156 rongnung NPF nungi 121, BJP nungi 13 aser tanüngba 22 ji Independent candidates lir.
State Election Commission osang ka ajanga ashiba agi, tenüng agütsüba mezüng anogo, January 3 nü nisung 13-i tenüng agutsü, yashi nisung 58 aser tanü nisung 85-i tenüng agütsüogo.
Municipal Councils 3 aser Town Councils 29 nung wards 353 lir, aser item atema February 1 nü election agitsü.
Tanü tenüng agutsürtemji- Dimapur Municipal Council nungi 29, East Dimapur nungi 1, Jalukie – 6, Phek 4, Tizit 9; Samatore 2, Longleng 4, Wokha 17, Peren 1, Naginimora 9 aser Tseminyu nungi candidate 3 lir.
Ajisüaka Angami Public Organisation (APO), Ao Senden, Sumi Hoho, Lotha Hoho, Chakhesang Public Organisation, Meluri Area Public Organisation densema state nung tribal tentettemi iba election nokdanga arudar.

Ao Sendeni candidate 9 jaoker
Ano külen Mokokchung district kübok Ao Senden-i telemtetba nungi masetshiba den külemi Returning Officer’s office-i aoba lenmangtem nükdar.
Ao Sendeni election nokdangaka Tuli Town Council atema tenüng agutsür candidate 9 jaokogo, aser asüng senden amenba sülenang parnok anema telemtetbaji jangjatsü, ta osang ka ajanga ashi.
Maneni Kohima aser Dimapur district nunga APO-i Angami Youth Organisation aser Chakhro Youth Organisation züngsemtem ajanga candidates tenüng agutsütsüpur nokdanger.
Parnokisa Naga nunger ajak dang Municipal elections nung shilem magitsü atema ozülu balala ajanga ajungshi.
“Naga nungeri meranga inyakba ajanga ajangzüktetbaji senotsü tajangzük agi memelenzüktettsü,” ta APO-i ashi.
APO-isa, “Ajak kasa dang. Tetsü-tebur lemdanga shilem wazüka yutsübaji Naga nungeri memetet. Tetsürtem nem shilem 33 wazüka yutsübaji magizüker,” ta metetdaktsü.
APO-isa Joint Action Committee of Naga Mothers’ Association (NMA) dang Naga nunger tarutsü den asayaba anenang, ta shiogo.
NMA-i sorkar dang tetsürtem nem shilem wazüka yutsütsü atema sorkar rongshia Supreme Court nung benok, aser iba telangzübaji tang tashi nung ngua meliaka ibaji tongtetogo, kechiyong sorkari court obendang matai ULBs election agitsü atema February 1, 2017 nü lemteta ayu, ta parnokisa ashi.
Tang tashi nung Kohima aser Mokokchung Municipal Councils nung election atema tenüng agüja mali, iba den külemi tanga districts town councils nung Kiphire aser Zunheboto densema lir.