Nagaland nung Uniform Civil Code mebenoktsüla : NTC

Dimapur, November 15 (TYO) : Nagaland ya tribal state ka lir aser July 1960 nung Govt. of India aser taoba Naga People’s Convention tsüngda tenangzüktep agiba sülen, Constitution (13th Amendment) Act, 1962 kübok state ka aküm, ta Nagaland Tribes Council (NTC)-i Union Law Commission, New Delhi Chairman dangi züluba shidi ka nung shia lir.
Naga nunger lokti, sobaliba aser inyakyimtemji India Linük Temzüng nung Arla 371A kübok kümzüka lir aser iba nung Naga nunger tebur aser tetsür ajak temulung süa temeten wazüka lir, ta NTC-isa metetdaktsü.
Linük nung tangar dang nungi onok sobaliba aser inyaksangshi khenyongi balaka lir aser Uniform Civil Code ya amshitsü tenzükra, onok iba ozüng kübok timtem jenti ajurutsü. Iba ozüng ya onok sobaliba aser lokti nung inyaksangshitem den meputep, anungji onok madak iba ozüng amshira tetsükdaktsü aika ajurutsü, ta NTC General Secretary, Nribemo Ngullie aser President, Lendinoktang Ao nati shidi nung shia lir.
“Nagaland Tribes Council ya Nagaland state nung public-i pusema nungitba tongti telok ka lir aser iba jagi onoki nü dang Uniform Civil Code ya Nagaland nungbo mebenoktsü atema centre sorkar dangi abentsü mepishir” ta NTC mendenpurtemisa Union Law Commission, New Delhi Chairman dangi mepishiogo.