Nagaland nung World Cancer Day amung

February 04, 2019 nü Naga Hospital Authority Kohima (NHAK), Kohima nung “I am, Will” omen nung ajemdaker World Cancer Day anogomong amongdang Nursing students-i (abelen) ken ka atenba nung angur. Ajichilen noksa nung Dr Thorhusie Katiry-i o jembiba angur.

Kohima, February 04 (TYO): India linük nung cancer tashidak agi shiranger jenti aliba state rongnung Nagaland densema lir, aser iba dak sendakba nung tanü Kohima nung World Cancer Day anogomong ayongzüka amongdang iba tashidak indang osang proktsü aser mapang shidak nung tashidak puteta teyari agitsü atema tayongzükba agutsüogo, ta ketadangsertem osang ka ajanga metetdaktsü.
Tanü Kohima nung Department of Health & Family Welfare-i ayongzüka Naga Hospital Authority Kohima (NHAK) nung “I am, Will” omen nung ajemdaker World Cancer Day anogomong sentong agiogo; iba sentong ya Population Based Cancer Registry, Nagaland lenisüba nung agi.
Sentong nung jembidang NHAK Managing Director, Dr Thorhusie Katiry-i, “Iba tashidak indang awareness junga agutsüba ajanga mapang shidak nung tashidak puteta treatment junga agitettsü,” ta ashi.
Cancer ya memenatepba tashidak ka kümogo, ta shia pai mapang shidak nung iba tashidak puteta teyari agiba ajanga taneptsü angutsü, ta ashi.
Iba dak sendakba nung pai, iba tetsübutsü tashidak ya azüoktsü nüngdak aser iba khuretji medical aser osangbenertemi agizüka awareness agutsütsüla, ibaji ajanga nisungtemi mapang shidak nung tashidak puteta anepalutettsü, ta ashi.
Kasa sentong nung jembidang Principal Investigator PBCR, Dr Vinostole Khamo-i, shiranger aikati cancer tashidak ya ‘tasüba obendang’ ka ama bilemer aser parnoki cancer stage tetenzüklen treatment junga magir, iba kuliji ajanga tanü alima nung küm shia cancer tashidak agi nisung 26,000 asür, ta metetdaktsü.
“Küm 20 tejaklenbo cancer tashidak ya taneptsü manguba tashidak ka ta bilema liasü, ajisüaka tanübo Medical Science ajanga tasen aika yanglutetba den külemi anogoshia research aika agidar,” ta lai ashi.
“Mapang shidak nung iba tashidak putetra khenyongi taneptsü angutsü,” ta lai ashi. “Tumour nung ajemdaker cancer tashidak ya stage pezü tashi lemsa-a lir. Mezüngbuba aser tanabuba stage na nung iba tashidak junga aneplutettsü, tasembuba statge nung shiranger ka arishi talangba kümdaktsütettsü akok, ajisüaka tatembangbuba stage (stage 4) nungbo shiranger ka anepalua yaritsüji kanga tasak akumer,” ta lai metetdaktsü.
Cancer adokdaktsüba tongtibangtiba kuliji gutkha, pan, moko mesepba densema moko tapu balala achiba ajanga lir, ta shia lai nüburtem dang taküm anema alitsü atema moko nungi pila-a alitsü ayongzük.
Iba sentong ya Dr Lalkrawsthangi Khalo leniba nung agi; School of Nursing NHAK nungi student nurse temi ken ka aten aser Dr Zuchamo Patton-i tepela anküp o jembia liasü.