Nagaland nung World Population Day 2017 amung

July 11, 2017 ya  World Population Day  liasü aser iba anogomong sentong ka Dimapur nung alidang DC Dimapur, Kesonyu Yhome den Health & Family Welfare ketdangsertem den agiba noksa ka yangi angur. July 11,  2017.

Dimapur, July 11 (TYO): Alima den külemi Nagaland nung Mongulbarnü World Population Day, 2017 mungogo. Iba sentong ya Chapel Hall, District Hospital Dimapur nung ayongzüka agi.
Taküm indang omenji “New Wave, New Believe, Family Development through complete responsibility” lir aser Dimapur Deputy Commissioner, Kesonyu Yhome-i tongti tesemdanger ama shilem agi.
Sentong nung o jembidang, Yhome-i “nütsüng yongsük teimba akümba tebilemtsüji Health & Family Welfare Department indang dang masü saka iba ya khuret abenba senso ajak indang tebilemtsü lir” ta ashi.
“Nütsüng teimba küma aoba ya lokti aser yimten asoshi khuret ka lir aser iba nung health sendaktepa lir. Iba khuret atema tesemtem sasep nung olemtep aser department balala tsüngda amalitepa inyaktsü nüngdaker” ta Dimapur Deputy Commisioner-isa ayongzük.
“Alima nütsüng yongsük nungi shilem 18 shi ka India nung lir saka alibo shilem 2.4 shi ka dang lir.
Anungji, nütsüng teimba akümbaji kibong shia asoshi khuret lir aser iba sentong agiba ajanga sendaktepa alirtem ajaki khuret tali angateta mapa inyaka aotsü imlar” ta paisa shisem.
Sentong nung mendenji Dimapur CMO, Dr.Vikato Kinimi liasü, School of Nursing nungi nurse temi ken ka aten, Health & Family Welfare Directorate ketdangsertemi o jembi aser M.S.DHD, Dr.C.W. Tungoe-i anküp tepela o jembi.