Nagaland nung World Tourism Day among

Dimapur, September 27 (TYO): September 27, 2019 nü Tourism Department-i Dimapur nung World Tourism Day 2019 ayongzüka mongogo.
Taküm atema omenji “Tourism and jobs: A better future for all” liasü.
Sentong nung tetushi süa jaokerji Tourism, Art & Culture Advisor H. Khehovi Yeputhomi liasü aser pai alima nung tourism maparen ajanga tajangzük bentsür aruba onük kar lemsatep.
“Nagaland nung yimtsüng aika aser sobaliba balala aliba kintem lir. Iba denji külemi asen state nung tobur tajung tesem aika lir, anungji asenok indang teinyaktsü aika lir. Tourism den tanga wadang balala sendaktepba ajanga rongsenkettsüng jenjang renloktsü,” ta pai metetdaktsü.
Khehovi-isa Nagaland nung IHM institute ka lapokba indang olen jembidang, “iba ya shisaliok rejutemi tourism industry atema longjemba lir aser skill tesayuba den tanga onüktem sayutsü,” ta ashi.
Taküm World Tourism Day amongtsü atema UNWTO-i India shimba atema atema pelar. Tourism maparen nung mongintem teyari ajanga Nagaland sorkari tourism sector tsütsü tayongzükba ajurua alibatem koktettsü aser mapa talila adokdaktsütsü imlar, ta Advisor Khehovi Yeputhomi-isa ashi.
Tanü pai Tourism Information and Ticketing Kiosk lapoktsü.
Tanü agiba sentong nung mendenji Additional Secretary, Tourism Martha R Ritse liasü aser lai ashiba agi “iba anogo ya global tourism atema tongtipang anogo ka ta züngshir aser tourism-i shilem agiba osang metetdaktsür.”
“Alima dang tourism ajanga lokti, sobaliba aser rongsenkettsüng tashi itdaktsüba indang osang metetdaktsütsü atema World Tourism Day amonger” ta laisa metetdaktsü.
Sentong nung Pretty Rhythm-i ken ka aten, Associate Pastor, SBC Diphupar, Mughakhi Zhimo-i temoatsü meshia sarasadem aser Deputy Director, Tourism Akhale Vizol-i anküp tepela o jembi.