Nagaland nung yangluba Aadhaar cards jungjunga reprangdangtsüla

Dimapur, November 11 (TYO): Tawa tu Dimapur Commissionerate Special Branch (DCSB)-i Dimapur nung taila Aadhaar card yangluba inyakyim bushitetba atema tenüngsang agütsür, ta CNTC-i metetdaktsü.
Taitsü aketba kulikakettem amshia Aadhaar card meyirang aika yanglubaji Assam state nungi aruba illegal immigrants nem agütsü ta temulung malemer. Anungji, ozüngi memelaba center tem nungi agütsüba Aadhaar card temji state sorkari nokdangtsüla aser taoba mapang Nagaland state nung yangluba Aadhaar ajak jungjunga reprangdangtsüla, ta CNTC Media Cell sangdong ka nung ashi.
Iba onük atema chief minister aser home minister nati tena tajungtiba agi mapa inyaktsüla ta onokibo bilemer. Talisa iba onük atema ajaki yaritepa mapa inyaktsüla kechiyong tenati taoba mapang yamaji jembia lir, ta Media Cell sangdong nungsa metetdaktsü.
Nagaland nung Chief minister aser home minister nati Assam nung CM aser HM nunger den osangtsüsang metetpelatepa aser yaritepa inyaktsüla. Aji mesüra, Nagaland nung yangluba taila Aadhaar tem jagi ozüng alema arurtem nem India senso temeten agütsütsü, ta parnokisa shisem.
CNTC-isa colony GB, chairman aser council tem dang pei pei temeket nung kanga dang kümdang mittsü aser ozüng alema arurtem aliba metetra, police nem osang sangoktsütsü mepishia metetdaktsür, ta Media Cell-isa ashi.