Nagaland nung yi aser mozü

Nagaland nung nokdangaka menokdangtet aruagi timtem agütsübaji yi aser ozüngi memelaba mozütem ya asütsü. Alima nung tia majung kaji, nisung aikati ozüngi memelaba mapatem dang inyaka pei taküm aser kibong mesüa linür. Ibayongji, sen aatsü atema nisung taküm raksadaktsüba mozütem Myanmar len nungi timtem jenti agia bener adoka ayoker. Item mozütemji süngjanga masü aser ajema masü saka am (powder) küma menünger ayoker aser achir. Ozüngi memelaba mozütem rongnung jenjang tasaktibaji ibajia ka lir. Iba mozüji moko den külemi mokozü nung aseketer. Iba mozüji achidang mapang talangka agir saka temenembo kecha memenemer. Ibayongji, chia alidang apuka mesüra meputetter. Yimya agi mozü achirtemjisa awashi temetetba aser jembishinü  tajung asür, anungji parnoki tsüraburtem dena ashioktsütetter. Iba mozü achir jagi anogo nung sen 200 jenjangbo achir, anungji ita nung sen 6000 bo mozü nung endoker. Iba amaji yi ajemertemi kasa tebilemtsü bener arutsür. Atangji, Nagaland nungbo ozüngi yi meyangludaktsür aser meyokdaktsür. Ajisüaka, nisungi kechi techi aser tejem asür ibaji dang chinür aser jemnür, anungji yi meyangluba aser mayokba state Nagaland nung yi talubo angur. Ibaji asenok ajak asoshi tamakok aser taaktsüka lir. Yi meyanglutsü aser mayoktsü ozüngbo zünga ayu saka yi talubosa angur ta asüba agi, yakanü Dimapur nung Excise department o Prodigals Home na longjemer ozüngi memelaba mozü aser yi ajanga tebilemtsü bener arutsüba indang shisalemsatepdang, o jembir katibo Nagaland nung yi meyanglutsü aser mayoktsü nokdanga aliba ya agientsüla ta metetdaktsü. Atangji, yi nokdangba ozüng ya state government-ia agiener saka arogo tsübuba agi magiener. Yi nokdangaka yi jemer adoker, anungji yi ayoker ta asüba tebilemtsü akoktsü asoshi yi sademsadema yokdaktsüba jagi ajungtsü asü (?) ta ajaki bilemdangtsüla. Atangji, tia makar atemabo mechimeyongtsüji senotsü endoka talangka nungi bushia bener arua asüyonga achitsü aser ajemtsü, ajisüaka item ama peisasa mazüoktetba nisungtem kar mechi Nagaland nung yi sademsadema ayoktsü melatsübajibo pei chirnur ashioktsür asütsü. Mapa tajung aser tamajung inyakba ajak ya tenük agi anguba agi ajizüka inyakdang tenzükba nungi yimya sübaa akümba jaklatem lir. Aji oda, yimti yimdong ajak nung yi ayokba dokantem kanga topur junga yanglur yangji yi tapu ajak jenjang dalang agi angutsüsa lapoktsüra, school tanurtem oli aruli jajadang item jagi puadoktsü. Tang ya yimti aika nung yi temadak adokabo mayoker saka tesem kar nung tzü kisüng ayokba dokan ngura, ashiko, ibaji yi ayokba dokan asütsü. Naia parnok tendanga yi alidi ta ashitsüa akok. Yakanü Dimapur nung Excise aser Prodigals Home nati ayongba sentong nung arogo nungertema liasü. Iba senden nung ozüngi memelaba mechimeyongtsü achirtem tebilemtsü indang jembidang, arogoia Nagaland nung yi jemer aser mozü chirtem nüka anepalutsü asoshi nisung agi meperir ta metetdaktsü. Atangji, kodaser tamakok angur ta jembitsüba dang nungibo kodaser takok angutsü ta jembiba tajungba lir. Inyaker agi meperiba agi yi aser mozü nokdangba mapatem takok mengutetter ta asüba o nungjibo tebilemdangtsü lir. Inyaker peria maliyonga yimti nung tema nungbo tzü ayoker saka shitakba nungbo yi ayoker ta asüba dokantemjibo lapokliyongi pur shibangtsütsüla. Aji oda, arogo nunga inyaker peria maliyongbo yi ayoker aser yi jemerem dang lai o shia hopta nung kenbo sarasadem telongjem mapang agitettsü. Atangji, Nagaland nung tia majung ka atalokbaji, yi ya teburtem dang nungibo tetsürtemang tajemba ajemer amai kümogo. Item ajak denji kodang asenoki lenchi oagi inyakdir, asenoksa akoksatsü aser tarutsü jenjang raksatsür asütsü.