Nagaland nung yimdong nung yokyayokjirtem yaritsü

Kohima, June 21 (TYO): July ita nung Nagaland Street Vendors (Protection of Livelihood and Regulation of Street Vending) Scheme and Rules 2019 mapa küma inyaktsü.
Hokolbarnü yimdong nung yokyayokjir tetsürtem nem anüshi tulu 10 agütsüba sentong ka nung State Mission Director & Secretary State Urban Development Agency (SUDA), S Takatuba Aier-i iba osang metetdaktsü.
State sorkari Nagaland Street Vendors (Protection of Livelihood and Regulation of Street Vending) Scheme and Rules ana tashi lateta lir aser iba ya April 15 nü Gazette nung sangdongogo. July 2019 nungi Nagaland nung municipal aser town councils ajak nung iba scheme & rules mapa küma inyaktsü, ta paisa ashi.
Iba mapa tenzükba sülen municipal aser town council temi pei pei Town Vending Committee tentettsü aser parnoki yimdong nung yokyayokjirtem nem tawa shitak lemzüktsütsü aser tanga teyaritem agütsütsü, ta Takatuba-isa shisem.
Iba sentong nung Governor P B Acharya-ia o jembidang ‘yimdong nung yokyayokjirtem yaritsüla’ ta ashi.
Yimdong nung yokyayokjirtem nem tawa shitak lemzüktsütsüla. Maneni asenoki nüngdakbapurtem aser sensakertem asoshi central government scheme balala indang osang prokshitsüla, ta Acharya-isa ashi.
Iba sentong nung Governor Acharya den pa kinungtsü Kavita Acharya aser Rural Development Advisor Dr Neikiesalie Nicky Kire nungertemi women street vendors 10 nem anüshi agütsü.
Tanü street vendors aika adenshia lia Rajya Sainik Board Director in-charge, Rajeev Dong-i lucky draw ka ajanga anüshi angutsüpurtem shimtet.
Sentong nung mendenji Kohima Deputy Commissioner Anoop Khinchi liasü aser Kohima Municipal Council Administrator Kovi Meyase-i tesentepertem pelaa agizük.