Nagaland nung yimozülurtem sademsadema inyaktsü

Dimapur, November 15 (TYO) : Kodangsa Nagaland nung adokba osangkakettem nung ozüngi memelaba ( banned) telok nungi aruba osang adoktsüdir, ibaji ajaki meteta akümtsü aser telok balala tsüngda shisalemsatep tenzüktsü asoshi kecha miima meyui adoktsür, ajisüaka iba ama osang adokba jagi telok ka yarir mesüra lendong adokdaktsütsü inyaker mesüra tejak repranga adoktsür ta masü ta Nagaland nung adokba osangkaketem nung yimozülurtemi metetdaktsüogo.
Tawa Assam Rifles purtemi Nagaland nung adokba osangkakettem nung yimozülurtem dang NSCN-K teloki tangar amokmerena metetdaktsüba aser sarusachiba indang osang metetdaktsübaji parnok yaria inyakba mapatem asütsü, ibaji ozüng raksaba mapatem lir, anungji madoktsütsüla ta metetdaktsüba ken o langzüba osang ka nung iba ken o ya metetdaktsü.
Tang ama ozüngi nokdanga aliba (banned) telok ka indang osang metetdaktsübaji ozüng raksaba mapa ka ama agitsü ta ashiba jagi Assam Rifles purtemi Nagaland nung osangtsüsang sangdongba mapatem ola madokdaktsüi yuner asü (?) ta yimozülurtemisa ashi.
Nagaland nung aliba nübortem dak alima nung atalokba mapatem indang meteta alitsü temeten aser parnok taküm nung kongshitsüsa atalokba mapatem indang angadangtsü aser angashia metetter külen telemtetba agitsübaji parnok nungi agientsü makokba temeten lir ta Assam Rifles purtemia metettsüla ta yimozülurtemisa metetdaktsü.
Aji oda, Assam Rifles purtemi Nagaland nung osangzülurtemi ozüngi memelaba (banned) telok yarir ta ashiba jagi yimozülur aser osangbenertem taküm lendong nung yutsür, anungji Assam Rifles purtemi iba tangatetba nung meinyaktsüla ta parnoki ashi.
Alima nung senso shia nem pei bilemba jembitsü temeten agüja aliba atema nokdaker taküm kaka ama yimjung, democracy aser rongsen jenjang nung tajungba kümdaktsütsü asoshi nübortem atema bilema, osangtsüsang aser yimobilem züluba maparen nung tanga yimten tashi kecha nema tenokdangba aser timtem magütsüdaktsütsü aser tim tashila aser tejembitsülabo osangkakettem ajanga lemsadaktsütsü asoshi maongka agütsütsü ta yimozülurtemi metetdaktsü.
Aji oda, osangtsüsang agütsüdang osang aruba len jangjashiteptsü aser nükjidong lia inyaktsü aser yimjak nung mashitsülabo meshii ochishia inyaktsü ta yimozülurtemisa ashi.
Iba amaji kecha tenokdangba melii osangtsüsang bendena sangdongtsü aser shisalemsateptsü temeten aketba mapatem ajak sademsadema inyaktsü ta parnokisa ametetdaktsü.
Tang ama atalokba ken o nung Press Council of Indiai ashiba ama inyaktsü aser Nagaland sorkar den ajurutepa timi jembitsü mulunga lir ta yimozülurtemisa ashi.
Yimozülurtemi metetdaktsüba tangatetba ken o ya Nagaland nung telok kar yaria mesüra kar anemaa inyakba amato mangatettsüla ta parnokisa metetdaktsü.
November 16 ya küm shia National Press Day amonger, aser iba anogo nung pelatepa amongtsü melena mepelaba agi, yimozülurtemi iba sangdong ya agütsür. Iba sangdong agütsürtemji Nagaland Page yimozülur Wt. Monalisa Changkija, Nagaland Post yimozülur, Wb.Geoffery Yaden, Eastern Mirror yimozülur Wb.Wetobou Newmai, Morung Express yimozülur Dr.Aküm Longchari, Capi ( Angami) yimozülur Wb.M.Kire aser Tir Yimyim yimozülur K.Temjen Jamir nungertem liasü.