Nagaland nung Yisu Khrista shia aruba benjung amung

(Temalen noksa nung) March 27, 2016 anepdang WW-II Cemetery Kohima  nung Easter Sunrise Service agidang Chief Minister, T R Zeliang den pa kinungtsü, cabinet züngsemtem, KBPF ketdangsertem aser tangartem adenba noksa nung angur. (Tsünglanglen noksa nung) WW-II Cemetery Kohima nung Easter Sunrise Service nung telok tangokba angur.

Kohima, March 27 (TYO): Nagaland nung tamangertemi Yisu Khrista shia aruba anogo Easter Deobar kanga longsoa mungogo.
Iba anogomung nung Yisu Khristai meimchirtem temenen nungi alangzüktsü atema taküm bendanga agütsüba asoshi sarasadem sentong balala ayongzüka agi.
Kohima nung tamangertemi World War-II Cemetery nung adenshir Sunrise Service balaka agia liasü. Iba sentong ya Kohima Baptist Pastors’ Fellowship-i “Leper Tazüng” omen nung ajemdaker ayongzük.
Sentong nung Angami Baptist Churches Council Executive Director, Rev Dr Atsi Dolie-i Easter osang abendang, Khristantemi pei mulungjang nung Yisu lidaktsütsü aser leper tazüng indang kulitem alima dang sangdongtsü ayongzüka jembi.
Iba sentong nungsa Nagaland Chief Minister, T R Zeliang-ia salem osang jembidang Easter yagi Yisui tasüba madak takok anguba indang dang masü saka shia aruba Kibuba dak Khristan tamang ayuba sayur, ta ashi.
Easter ajanga teimla, taneptsü, tekümtet aser teti tatem makaba tepela angutsü asen mulungjang nung akasodaktsütsü moatsür, ta TR Zeliang-isa ashi.
Tanü sentong nung mendenji KBPF Vice President, Pastor Moba Konyak liasü, Pastor Sankara Narayan-i Lai zünga sarasadem aser Rengma o Chakhesang Baptist Arogotemi ken ajanga shilem agi.