Nagaland nung Yisu Khrista shia aruba benjung amung

April 16, 2017 nü WW-II Cemetery, Kohima nung tamangertem Easter Sunrise Service nung adenba aser tongti o jembi Rev Zhabu Terhuja den tangartem noksa nung angur.

Kohima, April 16 (TYO): Nagaland nung Khristantemi Yisu Khrista kangki nung metaba sülen shia aruba atema benjung tulu ayongzüka mungogo.
State tesem balala nung arogotemi Easter sentongtem ayongzüka agi aser iba mapang sayutsüngirtemi Yisu-i meimchirtem alangzüktsü atema tasü nungi shia aruba nung ajemdaker tamangertem taküm melenshitsü tayongzükba agüja liasü.
Nagaland yimtiba nung tanep tamangertemi World War-II cemetery nung adenshia special Sunrise Service nung aden.
Iba sentong ya Kohima Baptist Pastors’ Fellowship (KBPF)-i “Pa Shia Aruogo” omen nung ajemdaker ayongzük.
Sentong nung taoba Nagaland Baptist Church Council general secretary, Rev Zhabu Terhuja-i o jembidang, “Yisu kangki nung metaba ajanga Pai lokti nung tesentaktep tasen ka yanglu aser iba den Pai asenok meimba ama asenoka kati ka meimteptsü tetuyuba agütsü” ta ashi.
“Khristantemi Tsüngrem temeiem ya lokti nung tesentaktep ajak nung lemsateptsüla atema süoki ia blemtsüla” ta Rev Zhabu-isa ayongzük.
Paisa ashiba agi, “pei linük nung teraksa bener arutsüsa alima nung nisungtemi parnok temeten atema lungkak aiter aser rarar. Yisu-i pa indang temeten aser maongka ajak toktsür, ajemalua aküm aser meimchirtem temenen atema kanga bilemja Pa taküm bendanga agütsü.”
Yisu-i tashi angatsü angatet aser pa taginübatem toktsür meimchirtem atema ang talila bilemtsü. Tanü Tsüngremi Pa sülen anidaktsü atema ajar, tema tereprangtsü nung masü saka tanela nung angateta bendanga agütsütsü ayongzüker, ta Rev Zhabu-isa tesentepertem ayongzük.
Ibaji inyaktsü atema lenmang ana lir. Galatia 5 & 6 nung, pei taginübatem kangkidong nung metatsü aser tajangzük lia tanela metsü proktsü indang shia lir, ta paisa shisem.
“Easter Sunday ya mali ka asübo, Yisu kangki nung metaba anogoji alima putisotsü nung Hokolbar tamajungtiba süla, saka Yisu Khrista shia aruba tashi ajanga iba tetsübutsü anogo jagi Good Friday ta melentsü. Iba anogo ya ‘Hokolbar Tajungtiba’ ta ajatsü tetemsü, kechiyong iba Hokolbar anogo nung asen temenen ajak alangzük aser iba anogo nung Tsüngremi asenok dang teti tatem makaba taküm atema lenmang sayu,” ta Rev Zhabu-isa metetdaktsü.
Iba sentong nung KBPF Advisor, Rev Asangba Longkumer-i salem osang aben aser KBPF President, Rev Vevo Phesao-i anir Nagaland atema balaka sarasademba mapang agi.
Tanep sentong nung mendenji KBPF Associate Secretary, Pastor Nitoshe Zhimomi liasü, Pochury Baptist Church Associate Pastor, Mosa Tsang-i lai zünga sarasadem, Salvation Army Church nungi Lalrinpuii, ALBERT Church officer’s Hill aser NCRC Kohima Village temi ken ajanga shilem agi aser Tangkhul Baptist Church Pastor, Rev AS Vaoshok-i tenüngsang agüja tembang.