Nagaland nung zünger mapa mangur 70,420 lir

Cornerstone school Foundation cum Parents’ day sentong nung Mmhonlumo Kikon (abelen)-i o jembiba aser tanur choir-i ken ka atenba noksa nung angur.

Dimapur, Oct.04 (TYO) : Tang Nagaland nung zünger mapa bushirtem tenüng meyirijang neter noklang pezü ser metsü Employment department nung tenüng züluoka lir saka parnok rongnung karbo pei azüngba yari mapa meinyaktettsüsa lir ta Labour, Employment, Skill Development & Entrepreneurship & Border Affairs, Parliamentary Secretary, Wb.Mmhonlumo Kikoni metetdaktsü.
Pai iba o ya yashi Hombar nü yangi Cornerstone school tenzükba anogomong den külemi tsüraburtem anogomong sentong ka nung jembidang metetdaktsü. Atangji, Nagaland nung zünger mapa manguba tebilemtsü ya azüngba yari mapa inyak mashiba ajanga adoker saka ano Naga nunger lanurtem mapa manguba tebilemtsü ya private sector nung mapa angutsüsa mesayutetba ajanga lir, anungji lanurtem asoshi mapa inyaktsübaji government mapatem dang masü saka iba dang nungi tajungba aser teimba private sector nung adoker asünungji item mapatemji bushia inyak metettsüla ta paisa ashi.
Asenoki tsümartem dang aija kazünung asenok mapa mangutsü, anungji asenoka azümesena melii mapa inyak tenzüktsüla ta Mmhonlumoisa metetdaktsü.
India nung lanurtem dang mapa inyak sayutsü asoshi Union cabinet-i sen crore 12,000 latetja lir aser iba senji amshia 2016- 2020 tsüngda Pradhan Mantri Kaushal Vikas Yojana (PMKVY) ajanga nisung crore ka dang mapa tapu balala inyak sayutsü. Tang iba ya sentong 40 tashi center government kübok ministry aser department balalai agi tenzükogo. Iba ama sentong nung state government-ia shilem 25 % agitsü, anungji iba atema center nungi senotsüa lemzüktsütsü aser iba senji bank nung yur, kaketrejutem nung mapa inyak sayutsü asoshi sentong tenzüka inyakertem nem agütsütsü ta parliamentary Secretary, Mmhonlumoisa metetdaktsü.
Dimapur nung Cornerstone school aser college nung iba ama mapa inyak sayuba sentong tenzüka lir. Iba amaji Nagaland nung kaketrejutem den külem ser kaketshirtem dang mapa inyak sayuba sentong tenzüktsü state government sentong nung lir.
Iba sentong nung School Managing Board nung mendenbuba, Dr.Sashimeren Aier-i jembia liasü aser tsüraburtem tenüng nunga Wb.C.Bendangmereni jembia liasü.