Nagaland nunga AIDS Memorial Candlelight memorial liasü

Kohima, May 15 (TYO) : Deobarnü Nagaland nung 33 buba International AIDS Candlelight Memorial ayongzüka agiogo, aser iba mapang HIV/AIDS noktangba, azüokba aser anepaluba maparen nung shilem agitsü tayongzükba agütsü.
Iba sentong ya State Academy Hall, Kohima nung “Engage, Educate, Empower” omen nung ajemdaker agi aser NNP+ President, Lanu-i o jembidang, “HIV/AIDS agi taküm mesamatsü aser HIV aketertem nüma tanga lidaktsütsü atema iba mapatong ya tenzük,” ta ashi.
“Alima nungi iba wara agientsü atema asenok külemi longjemer nübortem, lokti tentettem, sorkartem aser tetenlartem ajungmesotsüla. Talisa asenoki lanuputu dang HIV anepaluba, noktangba aser anepaluba indang tesayuba agütsütsüla,” ta paisa metetdaktsü.
National AIDS Control Organisation-i agütsüba osang ajanga ashiba agi, general public rongnung HIV positive cases 0.88% nungi Nagaland nung timba lir, ta Network of Nagaland Drugs & AIDS Organization President, Abou Mere-ia tanü sentong nung metetdaktsü.
Tamalenbo ozüng alema temesepba mozümora achirtem aser yi ajemertem dak dang AIDS kanga bulua liasü saka tangbo general public dak kanga bulua menateper aser iba asoshi kanga sasa bilemer, ta Abou Mere-isa ashi.
HIV azüoktsü atema Mulungtet telok aikati awareness atema mapa inyaker saka state sorkari Article 21 (Right to Health) mapa küma metenzükba agi tamakok angur. Taoba ita trok tashi state sorkari HIV/AIDS dak sendakba senotsü magütsür aser ibaji ajanga Nagaland nung Drop-in Centre (DIC) inyakyim nung tetsükdaktsü ajurur, ta Mere-isa shisem.
State sorkari senotsü magütsüba atema mepelaba sayua May 17 aser 18, 2016 nung Nagaland nung lapoka aliba 53 DIC ajak shibanger lungkak aittsü, ta paisa metetdaktsü.
Mere-isa ashiba agi, Nagaland ya Khristan tem timba ser aliba state ka lir anungji arogoi awareness nung shilem agiba dang masü saka HIV keta alirtem anepalutsüla aser yaritsüla.
Iba sentong nung Pastor NCRC Kohima (Ao), Toshi Imchen-i temoatsü meshia sarasadem, State Tuberculosis Officer Dr K T Lotha-i o tatsüka jembi aser Little Tune-i ken ka aten.