Nagaland nunga Ambedkar tasoba anogo amung

Dr. BR Ambedkar asoba anogomung 125buba benjungmung sentong nung Minister Kiyanilie Peseyie, Minister C.L. John, Chief Secretary,Pankaj Kumar aser  RD Director, Metsubo Jamir nunger adenba noksa nung angur.  (Kohima, April 14, 2016) 

Kohima, April 14 (TYO): Rural Development Dept. aser Social Security & Welfare Dept. nati senteper April 14, 2016 nü Nagaland nunga Dr. BR Ambedkar asoba anogomung 125 buba benjungmung sentong ayongzüka RD Directorate conference hall, Kohima nung mungogo.
Iba sentong nung tongti tejaoker, Social Security & Welfare Minister, Kiyanilie-i, tayongzükba jenti ajuruba putu ka nung Ambedkar taküm otsü ya ajungmesoba ka lir, aser pai tepetzük tia nung alirtem aser rongsenkettsüng atema inyakba mapaji tenüngsang agütsütsü tetemsü, ta metetdaktsü.
Ambedkar-i linük Temzüng yangluba aser tetsürtem nem tashi agütsütsü atema pa mangdang aliba ajanga asen linük atema lenmang sadema lapoktsü, ta paisa shisem.
Kiyanilie-i, yimjiyimjung nung alitsüla aser ajak kasa züngshitsüla, ibaji Ambedkar mangdang liasü, ta ayongzük.
Kasa sentong nung tetushi tejaoker, Rural Development Minister, C.L. John-i Dr. B.R. Ambedkar aser tangartem ajanga linük Temzüng nung welfare state agizükba aser Directive Principles nung ajemdaker 2006 küm Parliament nung MGNREG Act agizüka India yimtsüngtem nung mapa aser terenlok agütsüba indang tatongi metetdaktsü.
Nagaland nung Panchayati Raj melen VDBs aliba indang paisa metetdaktsüba den külemi Panchayati Raj Ministry kübok state nema pei tata terenlok agütsütsü imlar, ta ashi.
Iba sentong nung Chief Secretary aser Minister temi Ambedkar noksa nung narozük azükja akhüm agüja liasü.
Chief Secretary, Pankaj Kumar, IAS menden ser iba sentong agi aser Social Welfare Secy., Dellirose Sakhrie IAS-i Dr BR Ambedkar taküm otsü metetdaktsü.