Nagaland nunga Anti-Terrorism Day amung

Kohima, May 21 (TYO): Linük den külemi Nagaland nunga tanü Anti-Terrorism Day sentong ayongzüka mungogo. Iba sentong nung kiralongraba aser ozüng alema inyakba mapatem anema noktaktsü bangzüngtep.
Honibarnü Civil Secretariat, Kohima nung sentong agidang, Nagaland Chief Secretary, Pankaj Kumar-i ashiba agi, taoba mapang South-East Asia aser India nung kiralongraba mapatem ajanga takoksa jenti nguogo.
Tanü asen linük nung item inyaksangshi anendaktsütsü atema tangatettep aser telongjem kanga lir, ta Pankaj Kumar-isa metetdaktsü.
Paisa nübortem dang asen loktiliba nung kiralongraba anendaktsütsü atema tenangzükba agishitsü aser bangjemshitsü aser ano mulungtet teloktemi linük nung kiralongraba anema noktaktsü ayongzük.
Chief Secretary-i sentong nung adenertem nem Anti-Terrorism tenangzükba agidaktsü.
“Onok, India nung sensotemi, asen linük nung azütokshi malitsü aser aremzüktsü tesayuba nung tamang kaa, onok tashi ajaki agi kiralongraba aser ozüng alema inyakba mapatem anema noktaktsü tenangzükba agir. Onoki yimjung, loktiliba nung putepa alitsü aser meimchitem tsüngda angatettepa alitsü, aser meimchir taküm aser tangatetba amokmerenertem anema raratsü nangzüker,” ta tanü Anti-Terrorism tenangzükba agi.
Iba anogomung ya district headquarters ajak nung Deputy Commissioner lenisüba kübok aser state ajungalen state o central government office tem nung amung.