Nagaland nunga BIOMETRIC SYSTEM

Mapang ka nungbo office aser nija reju balala ajak nung mapa inyakertemi anogoshia mapai aruba kulisüa kolom/pen agi register nung sign süa liasü, ajisüaka tanübo anogoshia technology ajanga inyakyim tasen aika purapiteter aser item rongnung pei mapai aruba kuli sayutsü atema software tasen ‘Biometric Attendance System’ yanglutetba ya ka asütsü. Register nung pen agi sign asüba aser Biometric attendance nung meyongnem na tepilaji- register nungbo na menor office tongaka mapang shitak zülutettsü, nisung kari na atema sign sutsütettsü akok mesüra anogo ishika sülen nai tesüiba anogotem atema sign sütettsü, ajisüaka Biometric System nungbo nai külakkübong mesütettsü, kechiyong nü meyongnem (fingerprint) den kasaji alima nung shinga mali. Iba ya nü dak tashitak ka tendangtsü atema nü melen tangar ka temang tendangtsü makokba medem lir. Anogo ishika tejaklen Nagaland Secretariat Conference Hall, Kohima nung Department balala nungi tongtitem (HODS/AHODS) senden nung Nagaland Chief Secretary, Pankaj Kumar-i Biometric Attendance System tenzüktsüba asenoki osangkaket nung züngogo. Iba sentong nung pai ketdangsertem dang ‘tatishitsü tajung sayur kaka asütsüla’ ta tayongzükba agütsü. Iba dak alia pai ketdangser aser mapa inyakertem ajaki Biometric Attendance System ochishia amshitsüla ta shiogo. Mapang ka nungbo asen lima nunga school aser office ajak nung Aadhaar-enabled Bio-metric Attendance System (AEBAS) ya amshitsü imlar. Idangjibo sorkar mapa temelen inyakdaktsüba aser tesayur temelen yokba inyakyim meshimeshia malitsü südi. Sorkar school tem aser sorkari yariba school tem nung tesayurtem aser kaketshirtem school-i junga maruba aser school tom nung kidangi aoba nokdangtsü nükjidong nung Karnataka state sorkar aser Union sorkar senteper school tem nung biometric system amshitsü maparen tenzükogo aser mezüngbubaren nung Bengaluru, Mysuru, Kalaburagi aser Belagavi shia nungi district kaka nung benoktsü. India South tsütsülen aliba Catholic school tem nung balaka Biometric System ya kanga buloa amshir; Anepdang 8:15 ako tashi nungbosa tesayurtem school tongseptsüla, second ka danga süir arunungbo iba anogojibo pa/laji nüja inyaker asütsü kechiyong iba anogo atema taa malitsü. Sorkar Service Rules nung sorkar mapa inyaker ajak mapang shitak amshia mapai aotsü aser nendaka inyaktsü latetja lir. Iba tangatetba nung yaküm Centre sorkari office ajak nung AEBAS benokogo aser aibenelertem nem temerenshi agütsür. Iba den külemi anogoshia office-i aruba osang tejangja metettsü atema website ka lapoka liasü aser June 22, 2015 anogo nungbo register süa aliba mapa inyaker 1,29,895 nungi nisung 62,761 dang office-i aruba putet. Iba den kasa asen state nunga sorkar mapa inyaker jenti mapai maor, koba ajanga nüburtem junga metenzükteter aser takoksa ajurudaktsür, kechiyong yimtsüngtem nungi office nüngdak balala atema nübo aser rongsen jenti indoka jilai aoer saka office nung inyakertem mapang shitak nung majurur. Sorkar mapa süaka nija mapa süaka, mapa tulu süaka mapa tila ka dang süaka pei tata mapaji nendaka inyaktsüla, ajisüaka nisung aika iba tangatetba agi anünga lir. Itasen aginü aser sorkari agütsüba tajangzük balala aginü tashibo ajaki mapang shitak amshia mapai oa nendaka inyaktsüji pei shilem, ajisüaka tanü asen lima nung pei kidang ayongayonga ita songtema kazür itasen agizüki dang office-i aoba aser sorkari agütsüba tajangzük balala agiba nisung aika lir. Atangji iba aibelen ya Tsüngrem aser nisung naprongla na dang sentsühtsür ka asütsü aser talisa Khristan tesayuba den khenyongi meputep.